Charter Document - 02070044
| Charter Number: | 02070044 |
|---|---|
| Cartulary Title: | Cartulaire de l'Evêché d'Autun |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1270 |
| Date type: | Internal, A.D., Feast |
| Resource Link(s): |
|
Charter:
Dilecto et fideli domini regis Francie episcopo Eduensi gerenti administrationem archiepiscopatus Ludunensis sede vacante vel ei qui tenet locum ipsius in civitate et dyocesi Ludunensi Matheus miseratione divina ecclesie beati Dyonisii in Francia abbas humilis et Symon dominus de Nigelle tenentes locum domini regis Francie salutem Cum reverendus pater Symon tituli Sancte Cecilie presbiter cardinalis olim apostolice sedis legatus discreto viro magistro Philipo de Carnoto canonico ecclesie beate Marie de Vernone exhibitori presentium super negocio centesime redemptionum votorum crucesignatorum legatorum datorum terre sancte subsidio relictorum ac aliarum obventionum undecumque ipsi subsidio obvenientium in civitate et dyocesi Ludunensi ac aliis civitatibus et dyocesibus ejusdem provincie commisit vices suas ex auctoritate et vice domini regis dilectionem vestram requirimus et rogamus quatinus circa promotionem negociorum terre sancte dicto magistro Philipo ut premissum est commissorum curam et diligentiam apponatis et per suffraganeos et alios subditos dicte sedi Ludunensi apponi faciatis ipsumque Philipum in agendis prout poteritis dirigentes cum ab ipso vel ex parte sua fueritis requisiti Actum Parisius die jovis ante cathedram Sancti Petri anno Domini millesimo ducentesimo septuagesimo