Charter Document - 02070041

Universis presentes litteras inspecturis nos M[ilo] decanus et capitulum prime Lugdunensis ecclesie notum facimus quod cum reverendus in Christo pater dominus Girardus Dei gracia episcopus Eduensis gerens administrationem archiepiscopatus Lugdunensis ipsius sede vacante tulerit excommunicationis sentencias in cives et habitatores Lugdunenses necnon ipsam civitatem Lugdunensem ecclesiastico supposuerit interdicto propter excessus commissos a civibus et habitatoribus Lugdunensibus supradictis contra sedem archiepiscopalem Lugdunensem quas sentencias dicebatur esse relaxandas seu amovendas prestita cautione de stando juri cum dicerentur esse late non pro manifestis seu notoriis excessibus sed dubiis nobis decano et capitulo predictis in contrarium asserentibus et dicentibus predictas sentencias non esse aliquatenus relaxandas seu amovendas nisi prius sufficiens et competens prestetur emenda cum dicte excommunicationis sentencie non pro dubiis excessibus sed pro manifestis et notariis injuriis et excessibus canonice sint prolate Nos dicti decanus et capitulum promittimus bona fide eidem domino episcopo sollempniter stipulanti et nos et nostra ad hoc specialiter obligamus quod si predictus dominus episcopus Eduensis aut ecclesia Eduensis aut aliquis successorum ejusdem in ecclesia Eduensi occasione dictarum interdicti et excommunicationis sentenciarum prolatarum non relaxatarum seu amotarum aliqua dampna deperdita costamenta incurreret aut etiam sustineret nos eadem dampna deperdita et costamenta ac etiam interesse tenemus et promittimus bona fide ex stipulatione predicta eidem domino episcopo et ecclesie sue Eduensi ac ejusdem successoribus in ecclesia Eduensi reddere restituere ac integraliter resarcire et contra omnes predictum dominum episcopum ecclesiam suam predictam ac ejusdem domini episcopi successores occasione prolationis dictarum interdicti et excommunicationis sentenciarum non relaxatarum aut etiam amotarum indempnem modis omnibus observare et omne onus littis cum propriis sumptibus et expensis nostris in nos suscipere et cause periculum si forte quod absit contingeret quod eidem domino episcopo aut ecclesie sue predicte vel successoribus suis in dicta ecclesia Eduensi super predictis sentenciis coram summo pontifice legatis delegatis subdelegatis ordinariis aut aliis quibuscumque judicibus ecclesiasticis vel secularibus questio moveretur Renunciantes nos decanus et capitulum predicti in hoc facto ex certa scientia et bona fide exceptioni doli metus et in factum promissionis et obligationis legitime non factarum [] In cujus rei testimonium sigillum capituli nostri presentibus litteris duximus apponendum Datum et actum apud Sanctum Justum anno Domini millesimo ducentesimo septuagesimo mense augusti