Charter Document - 02070035
| Charter Number: | 02070035 |
|---|---|
| Cartulary Title: | Cartulaire de l'Evêché d'Autun |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1264 |
| Date type: | Internal |
| Resource Link(s): |
|
Charter:
Urbanus episcopus servus servorum Dei dilectis filiis abbati Sancti Petri thesaurario et officiali Cabilonensi salutem et apostolicam benedictionem Sua nobis venerabilis frater noster episcopus Eduensis petitione monstravit quod cum ipse ad prioratum de Marcigniaco Cluniacensis ordinis Eduensis diocesis sibi lege diocesana subjectum accessisset ibidem prout ad eum pertinet visitationis officium impensurus quia prior prioratus ejusdem episcopum ipsum ad visitationem hujusmodi admittere ac procurationem ratione visitationis sibi debitam exhibere contra justiciam denegavit episcopus ipse in eundem priorem canonica monitione premissa excommunicationis et in ecclesiam ipsius prioratus interdicti sentencias exigente justicia promulgavit quas dictus prior dampnaliter vilipendens divina officia celebrare immo quantum in eo est potius prophanare presumit in anime sue periculum plurimorum scandalum et ecclesiastice discipline contemptum Quare prefatus episcopus humiliter petebat a nobis ut easdem sentencias robur firmitatis debitum obtinere dictumque priorem de presumptione hujusmodi pena puniri canonica faceremus Ideoque discretioni vestre per apostolica scripta mandamus quatinus dictas excommunicationis et interdicti sentencias sicut rationabiliter sunt prolate faciatis auctoritate nostra usque ad satisfactionem condignam appellatione remota inviolabiliter observari Super eo vero quod idem prior divina taliter prophanare dicitur quod canonicum fuerit appellatione postposita decernatis facientes quod decreviritis per censuram ecclesiasticam firmiter observari Quod si non omnes hiis exequendis potueritis interesse duo vestrum ea nichilominus exequantur Datum apud Urbemveterem III idus octobris pontificatus nostri anno tertio