Charter Document - 02070028

Innocentius episcopus servus servorum Dei venerabili fratri episcopo Eduensi salutem et apostolicam benedictionem Cum sicut accepimus abbates priores et monachi ordinis sancti Benedicti tue civitatis et diocesis statuta pro reformatione ipsius ordinis a felicis recordationis Gregorio papa predecessore nostro edita que tibi sub bulla nostra non retinenda sed transcribenda ut exinde certior habearis transmittimus non observent fraternitati tue per apostolica scripta in virtute obedientie firmiter precipiendo mandamus quatinus inquisita super hiis diligentius veritate statuta ipsa facias ab universis personis ejusdem ordinis predictarum civitatis et diocesis tam exemptis quam non exemptis exacta diligentia observari non obstante si eis vel earum collegiis quod excommunicari suspendi vel interdici non valeant a sede apostolica sit indultum et universis indulgentiis privilegiis seu litteris apostolicis obtentis et obtinendis et quibuslibet aliis per que id impediri vel differri valeat et de quibus specialem oporteat in presentibus fieri mentionem Inquirere quoque te volumus diligenter si que dictarum personarum eadem statuta hactenus non servarunt et si quas ipsarum eadem inveneris preterisse nobis tuis studeas litteris fideliter intimare contradictores per censuram ecclesiasticam appellatione postposita compescendo Datum Perusii X kalendas januarii pontificatus nostri anno nono