Charter Document - 02062202

Come contans fust meuz antre Gilbaut de Seint Verain d'une part et Jehanz seignor de Chastoillon an Bazois escuier et mon seignor Henri chevaliers et Hugues clerc frères dou dit Jehanz d'autre sur ce que li diz Gilbauz disoit que mes sires Jehanz chevaliers sires cai an arriers de Chastoillon pères es devant diz Jehanz Henri et Hugues avoit hau cai an arriers does fames por mariaige et que dou premier mariaige issist la mère au dit Gilbauz qui morte est la cui persone li diz Gilbaut representa et dou segont mariaige issirent les diz Jehanz Henri et Hugues si disoit li diz Gilbauz que por la costume dou pais li diz Gilbauz an devoit porter la moitié de totes les choses que li diz mes sires Jehanz chevaliers avoit au temps que il fist lou premier mariaige et ansinc la moitié des choses acquises durant lou dit mariaige et lou meillor maneu et quant que il li pooit avenir de descendue de père et de mère et ancore ou quart des choses desus dites sa partie et son frèraige et ces choses il demandoit es devant diz Jehanz Henri et Hugues frères la quel tenoient les devant dites choses si cum il disoit et si demandoit ancor doze mil livres d'arreraiges dou tamps quil avoient tenu ces choses les diz frères c'est à savoir Jehanz Henri et Hugues disanz et proposanz lou contraire A la parfin dou consoil de bones genz especiaulmant de redouté père Pierre por la grace de Deu avesque d'Orliens fut faiz acorz paiz et transactions antre les dites partie an la manière que s'an siet Ce est à savoir que por lou partaige et por lou frèraige au dit Gilbaut et por ce que il pooit demander des choses de sus dites li diz Gilbauz anporte an possession et an proprieté la maison de Vilainnes an Bazois les granges et les estaubles et les jardins et douz cent livres à tornois de rente à aseoir au plus près de la dite maison an jostise et an seignorie les quex choses sunt et seront au dit Gilbaut pleinnemant an proprieté et an possession à lui et a ses hoirs et à ses successors ou a ces qui auront cause de lui à touz jors mais et de ces choses se sunt devestuz li diz Jehanz Henriz et Hugues et an ont revestu lou dit Gilbaut et bien plait es diz frères que li diz Gilbaut an entroit an l'ommaige lou conte de Nevers por raison de fiez et ont promis li diz Jehanz Henris et Hugues de touz detes obligacions et charges qui seroient faiz ou faites por les diz Jehanz Henri et Hugues ou por l'un d'aus délivrer les choses de sus dites à lor propres couz et à lor propres despans et ausi de totes obligacions faites au temps lor père se charges n'estoient ou rantes asisses sur la maison ou sur la terre de Vilainnes de quex charges et rantes s'elles estoient perpetuels li diz frères ne seroient pas tenuz au délivre mas la terre et la rante an seroit tant moins prisée come la charge monte et si doivent ancore li diz frères délivrer lou dit Gilbaut de part lor père de totes dotes et de touz laiz si est à savoir que les does cent livrées de rante doivent estre assises an terre randauble qui vaille doues cenz livres de rante por lou pris de II chevaliers esleuz des doues parties c'est à savoir por mon seignor Regnaut Lou Douz et mon seignor Pierre de Monz si ces II chevaliers devant dit estoient an descorz dou pris de la terre il doivent raporter lor descort à redoté père Pierre por la grace de Deu avesque d'Orliens li quex an puet faire tote sa volunté et les parties lou doivent tenir et se li diz II chevaliers estoient tuit an acort dou pris de la terre se puet li devanz diz redotez pères avesques d'Orliens amoindrir l'assise jusques à XX livrées de terre ou au moins de XX livrées de terre segon ce que li plaira Après il est asavoir que li maison de Vilainnes les granges et les estaubles et li jardins sanz vignes et sanz terre guaaignauble ne seroit pas prisée ainçois sunt et seront au diz Gilbaut sanz nul pris et ausi la jostise et la seignorie an la maison an tout ce qui assis li sera ne sera pas prisié ançois l'an portera sanz nul pris li diz Gilbaut mas totes autres choses c'est asavoir mains mortes vignes et terres guaignaubles et totes autres choses seront mises an pris Ancor quittent li devant diz Jehanz Henri et Hugues frères par aus et par lors hoirs au dit Gilbaut et à ses hoirs la moitier dou chasteaul et de la terre de Glane de la terre de Tavernai dou mès Richart et de Champignoles et des apertenances de ces leux et tout lou plain droit qui hi apertient ou peut apertenir si cum li diz Gilbaut les tient ou puet et doit tenir por raison et ansi li diz Gilbauz por soi et por ses hoirs quitte es devant diz frères Jehanz Henri et Hugues et à lor hoirs totes les autres choses qui lor sont venues de la descendue lor père et les apertenances de ces choses ou tout lou droit enterinemant si cum il les tiennent ou puent ou doivent tenir por raison et por ces choses facenz li diz Gilbaut d'une partie et li diz Jehanz Henri et Hugues d'autre se sunt antre quittiez paisiblemant et amiaublemant de toutes actions reales personels et quereles mehues et à movoir fuissient de fruit levez de dotes ou d'autres choses que l'une partie peust demander à l'autre jusque au jorz que ces lettres furent donées et promistrent les does parties por aus et par lors hoirs et por lors successors que gemais riens ne demanderont sauves anterinemant les covenances contenues an ces lettres Et est à savoir que li diz Gilbaut hai amoisené et baillié et fermé es diz frères c'est à savoir Jehanz Henri et Hugues la dite maison de Vilainnes les estaubles les granges et les jardins et does cenz livrées de rante qui doivent estre assises por does cenz livres de pansion à paier chascun an au dit Gilbaut ou à son commandemant ou à ses hoirs à Nevers es changes es termes qui s'an suivent c'est à savoir cent livres à la quinzainne de seint Andrieu et cent livres à Penthecoste an suivant et commancera la première paie à la quinzainne de la seint Andrier pruchainne ne venant por la quel pension paier li diz Jehanz Henri et Hugues se sunt obligié li uns por l'autre come principaul rendeour chascuns por lou tout et durera ceste moison et ceste ferme tant soulemant à la vie lou diz Hugues clerc et doit et promet li diz Gilbaut à garantir par raison de fiez ceste moison et ceste ferme an vers lou conte de Nevers de cui fiez ceste chouse muet et prometent li diz frères Jehanz Henri et Hugues por aus et por lors hoirs la dite pansion c'est à savoir les dites does cent livres à paier au dit Gilbaut et à ses hoirs ou à lor comandemant à Nevers anterinemant es termes de sus diz et se deffaut hi avoit por la paie il s'obligent por aus et por lor hoirs à paier par chascun jor que deffaut hi auroit XX solz de poigne à paier au dit Gilbaut et à ses hoirs por touz et por domaiges et por despans et tout ades la covenance demorra an son point et se doivent li diz Jehans Henri et Hugues la maison de Vilainnes et ausi les autres choses que lor sont bailliés ou à mooison et à ferme tenir an bon estat et prometent li diz Jehans Henri et Hugues por aus et por lors hoirs à rendre au dit Gilbaut et à ses hoirs touz couz et touz domaiges se la maison et les autres chouses qui sunt bailliés à mooison et à ferme n'estoient trovées an bon estat après la mort au dit Hugues la maison et les autres choses bailliés à ferme doivent revenir au dit Gilbaut et à ses hoirs quittes et délivres de totes charges dou temps à celi Hugues et la pansion sera quitte Après il est à savoir que li diz trois frères c'est à savoir Jehanz Henri et Hugues ont faite tel covenance an samble mas ce n'est mie por lou consentemant dou dit Gilbaut ce est à savoir que des does cent livres les quex il doivent paier aus dit Gilbaut por la mooison et por la ferme devant dite Jehanz an paiera quatre vinz livres et mes sires Henris sexante et Hugues sexante chascuns la moitié de sa partie es termes de sus dit et s'il avenoit choses que li uns ou li dui deffailloit ou deffailloient de faire paiemant de lor partie es termes de sus dit par quoi li autres ou li autre heust ou heussent domaige ou lor hoir cilz ou cilz qui auroit ou auroient heu domaige par deffaut de paiemant de l'autre ou des autres porroit ou porroient demander au deffaillant touz lor couz et touz lor domaiges et an seroient creu cil qui domaige hi auroit ou lor hoir por lor simple sairemant sanz autre prouve Et por ce que Vilainnes et les apertenances estoient torné çai an arrière à la parceon au dit Hugues dou partaige qui avoit esté fait antre aus trois et li diz Hugues s'en soit desvestuz an la main Gilbaut si cum il est desus contenuz li devant dit Jehanz et Henris font recompensation à lor frère tele cum il s'ansuit c'est à savoir que li diz Jehanz baille au dit Hugues de maintenant quatre vinz et diz livrées de terre an sa terre de Seulins et es apertenances et au plus près an suiguant et li diz Henris l'an baille ausi de maintenant sexante et diz livrées an sa terre de Merey et des apertenances et au plus près an suiguant les quex terres sunt bailliés au dit Hugues an propriété et an possession à vendre et ordener et obligier tout à sa volunté si come de son propre heritaige et promettent li devant dit frères Jehanz et Henri à tenir l'ordenemant tel cum li diz Hugues lou feroit de la terre devant dite de la quelle terre les diz Jehans et Henris se sont devestu et an ont revestu lou diz Hugues et est à savoir que l'assise des devant dites quatre vinz et diz livrées de terre de part Jehanz et des sexante et diz de par lou diz Henri doit estre faite et sera an la menière et an la forme et an la condition que la terre de Vilainnes doit estre assise à Gilbaut si cum il est desus dit et s'il avenoit chose que li diz Hugues vendist ou obligeast la terre desus dite li devant dit Hugues seroit tenuz de acquiter les diz Jehanz et Henri de la pansion des sept vinz livres an vers lou dit Gilbaut et se li diz Hugues ne les en delivroit et li diz Jehanz ou Henris hi eussent couz ou domaiges por ceste chose ou lor hoir li diz Hugues et si hoir seroient tenuz à aus et à lor hoirs touz couz et touz domaiges de rendre et an seroient creu il et lor hoir par lor simple sairemant sanz autre prouve Ancor s'acordent li diz freres c'est à savoir Henris et Jehanz devant dit que Hugues de Chastoillon lor frères devanz diz teigne de la maison de Vilainnes les does cent livres de rante si cum elle est baillié à ferme et à mooison touz les cours de sa vie et se ne sera tenuz li diz Hugues à paier de la pansion des does cent livres fors sexante livres chascun anz mas tout ades li diz Hugues doit tenir la maison et les autres choses an bon point et an bon estat et s'il avenoit chose que par ce que Hugues ne tenist la maison et les autres choses an bon estat li diz Jehanz et li diz Henris ou li uns d'aus ou lor hoir hi eussent couz ou domaiges li diz Hugues ou si hoirs lor sont tenuz de rendre anterinemant et an seroient creuz li diz Jehanz et li diz Henris ou lor hoirs par lor sairemant sanz autre prove Après il est à savoir que covenances que faceint li diz Jehanz Henris et Hugues an samble ne puet ne doit torner à préjudice au dit Gilbaut ne à ses hoirs que li diz Gilbaut et si hoirs ne puissent demander anterinemant la pansion des does cent livres et por lou deffaut la poigne si cum il est desus dit sauf ce que li diz Gilbauz s'acorde bien à ce que li diz Hugues teigne la maison et les does cent livrées de rante assises tout lou cours de sa vie et que se Hugues paie trestouz les anz lou cours de sa vie sexante livres es termes nommés que par deffaut des autres II frères li diz Gilbauz ne puisse tolir la ferme au diz Hugues tout lou cours de sa vie mas tout ades li diz Hugues sera tenuz por ses frères si cum il est de sus dit et par lor deffaut li diz Gilbauz et si hoirs porront faire prendre des choses au dit Hugues à Vilainnes et an autres leux qui suens seroient selonc les covenances de sus dites Toutes les choses desus dites an samble et chascune por soi c'est à savoir des covenances faites antre lou dit Gilbaut d'une part et les diz Jehanz Henri et Hugues d'autre et des covenances faites antre les diz Jehanz Henri et Hugues an samble sauf lou droit dou dit Gilbaut prometent li diz Gilbauz Jehanz Henri et Hugues à garder fermemant et anterinemant sanz corrumpre de riens et renoncent de certainne science à toutes exceptions et à toutes barres qui porroient les choses devant dites ou aucunes d'eles anpeschier ou amenusier et obligent por lou garder fermemant et anterinemant tres touz lor biens mobles et non mobles presenz et avenir an quel que leu qui soient et lor hoirs et lor successors et ces qui auront cause d'aus et s'an sozmetent à la juridicion nostre seignour lou roi an priant et an sopliant que li rois i mete son seaul por les choses confermer et por lou faire tenir et s'acordent à estre controint por la cour lou roi ou por la cour lou conte de Nevers laquelle court de cels does la partie qui voudra controindre eslire à garder toutes les covenances de sus dites et chascune por soi