Charter Document - 02060212

Nos frater Guido divina miseratione episcopus Claromontensis et nos magister Nicholaus de Cathalano thesaurarius Ebroicensis domini Philippi Dei gratia illustris regis Francie clericus notum facimus universis presentes litteras inspecturis quod cum venerabilis in Christo pater Girardus Dei gratia episcopus Eduensis gerens administrationem archiepiscopatus Lugdunensis tam in spiritualibus quam in temporalibus ipsius sede vacante sentencias excommunicationis tulisset auctoritate ordinaria competenti ut dicebat monitione premissa in cives et habitatores Lugdunenses necnon ipsam civitatem Lugdunensem ecclesiastico supposuisset interdicto propter causas hic inferius annotatas videlicet quia dicti cives et habitatores Lugdunenses claves portarum dicte civitatis tenebant ad dicte sedis jurisdictionem pertinentes et per vicos ipsius civitatis cathenas pontes et barras posuerant munitiones novas nichilominus et fossata in locis non consuetis fecerant per que impediebatur iter publicum ad civitatem et per civitatem Lugdunensem propter que predictus dominus episcopus Eduensis in pedagiis suis et mercatis dampnum non modicum sustinebat ut dicebat propter que etiam jurisdictio ipsius episcopi Eduensis in civitate Lugdunensi tam spiritualis quam temporalis diminuebatur et quasi adnichilabatur cum venientes ad curiam suam Lugdunensem liberum non haberent ingressum et egressum propter quod etiam plures excommunicati beneficium absolutionis sue optinere non poterant quod erat non modicum periculum animarum et ecclesiam de Magdalena Lugdunensi incastellaverant et ad usus redegerant seculares contra Deum et canonicas sanctiones fecerant etiam juramenta et conjurationes que redomdabant in prejudicium sue jurisdictionis Lugdunensis constituerant etiam duodecim cives quorum consilio ad instar universitatis tota predicta civitas Lugdunensis regebatur fecerant quoque convocationes et tractatus ad pulsationem campane collectas seu levas fecerant et faciebant in magna pecunie quantitate et nolentes solvere ad solutionem auctoritate propria compellebant saisiverant et saisiebant ac dissaisiebant et hostia domorum removebant et alia pignora capiebant clericos tailliabant et compellebant suis conferre collectis et alia ad ipsius domini episcopi Eduensis jurisdictionem pertinentia exercebant Que cum adeo essent notoria per ipsius facti evidenciam quod non poterant aliqua tergiversatione celari prout hec omnia et singula supradicta dicebat dominus Eduensis episcopus memoratus nos ad ipsam civitatem Lugdunensem de speciali mandato predicti domini regis accedentes pro pace et concordia inter dictum dominum episcopum Eduensem et dictos cives super premissis articulis seu causis ac sentenciis reformanda interposuimus partes nostras et nobis mediantibus inter dictum dominum episcopum Eduensem nomine suo et ecclesie Lugdunensis ex una parte et dictos cives Lugdunenses ex altera extitit super premissis concordatum amicabiliter in hunc modum claves portarum pontis Rodani Sancti Marcelli Sancti Georgii et Burgi Novi civitatis Lugdunensis tradentur Johanni de Losanna et Bernardo Maleinc civibus Lugdunensibus salvo jure in omnibus tam possessionis quam proprietatis in dictis clavibus tam sedi archiepiscopali Lugdunensi quam civibus memoratis Item dicti cives Lugdunenses predicta juramenta et conjurationes inter se initas et habitas sibi quittant ad invicem penitus et remittunt item predicti cives duodecim nullam cohertionem compulsionem aut quamcumque jurisdictionem habent nec habere debent in concives suos et civitatem Lugdunensem cum etiam cives ipsi Lugdunenses confessi fuerint coram nobis et coram dicto domino episcopo Eduensi quod ad hoc sunt ab eis dicti duodecim constituti non ut jurisdictionem qualemcumque habeant in concives sed quia ad tractandum ipsius civitatis et civium negocia non poterant omnes de civitate faciliter convenire expedicius cum dictis seu per dictos duodecim tanquam cum paucioribus quam cum tanta civium multitudine negociorum tractatus haberetur Preterea super articulo levarum confessi sunt dicti cives coram nobis et coram dicto domino episcopo Eduensi quod si in civitate Lugdunensi fieri contigerit collectam aliquam seu levam ad eos non pertinet cohercio nec aliquem possunt compellere ad solvendum super articulo de clericis tailliatis et compulsis dictorum civium conferre collectis ita concordatum est quod dicti cives super hoc stabunt juri Quia vero cathene pontes barre munitiones de novo constructe tunc temporis et fossata incastellaio ecclesie de Magdalena prout hec superius sunt expressa fuerunt tunc temporis per arbitrium inclite recordationis domini Ludovici quondam regis Francorum et bone memorie domini Radulphi quondam episcopi Albanensis Sedis apostolice tunc legati amote et amota et in quantum episcopum Eduensem et sedem archiepiscopalem Lugdunensem tangebat super predictis superius specialiter nominatis extitit satisfactum predictus dominus episcopus Eduensis animarum volens vitare periculum de nostro et aliorum bonorum virorum consilio consensit quod predictas sentencias amoveret In cujus rei testimonium et munimen ad requisitionem tam dicti domini episcopi Eduensis quam civium predictorum presentibus litteris sigilla nostra duximus apponenda Datum et actum apud Lugdunum anno Domini MCC septuagesimo primo XVI kalendas augusti