Charter Document - 02060210

Aymarus divina miseratione prime Lugdunensis ecclesie archiepiscopus officiali Lugdunensi et omnibus judicibus temporalem et spiritualem jurisdictionem exercentibus tam in civitate Lugdunensi quam in castris et villis ad sedem metropolitanam Lugdunensem spectantibus et omnibus castellanis seu deputatis vel deputandis ad custodiam castrorum vel fortaliciorum ad dictam metropolitanam ecclesiam pertinentium salutem in Domino sempiternam Cum nobis constet vacante sede metropolitanea Lugdunensi episcopum Eduensem qui pro tempore fuerit debere de antiqua et approbata consuetudine dictam sedem metropolitanam tenere et omnem administrationem tam in temporalibus quam in spiritualibus habere et omnia castra et fortalicia villas et domus sedis predicte tenere et fructus levare et suos integre facere sicut econtra idem jus per omnia de antiqua similiter et approbata consuetudine archiepiscopus Lugdunensis qui pro tempore fuerit sede Eduensi vacante obtinet in predictis Et nos ipsi viderimus reverendum patrem bone memorie Girardum quondam episcopum Eduensem consanguineum nostrum carissimum uti isto jure pluribus annis in ecclesia Lugdunensi nomine ecclesie Eduensis vacante sede Lugdunensi per resignationem Philippi de Sabaudia tunc electi Lugdunensis nunc comitis Sabaudie et nos versa vice usi sumus et in presentiarum utimur eodem jure in ecclesia Eduensi vacante per mortem dicti Girardi quondam episcopi Eduensis et hoc sit per rei evidenciam adeo notarium quod non potest aliqua tergiversatione celari Iccirco ne ex defectu nostro vel negligencia pereat seu perire possit vel ledi in aliquo jus quod in predictis ex predicta consuetudine competit ecclesie Eduensi vobis precipiendo mandamus sub vinculo juramenti super hoc nobis specialiter prestiti quatinus si contingerit nostram metropolitanam ecclesiam quoquo casu quod absit vacare vos officialis et judices predicti omnem jurisdictionem predictam spiritualem et temporalem episcopo Eduensi qui pro tempore fuerit vel suis deliberetis et ipsum vel suos in quasi corporalem possessionem jurisdictionis spiritualis vel temporalis inducatis et sigilla ad dictam jurisdictionem spiritualem et temporalem pertinentia eidem episcopo vel suis tradatis Et vos castellani seu deputati vel deputandi ad custodiam castrorum et fortaliciorum predictorum similiter dicta metropolitana ecclesia vacante omnia castra fortalicia villas et domus ad dictam metropolitanam sedem pertinentia vel pertinentes episcopo Eduensi qui pro tempore fuerit vel suis tradatis et deliberetis pacifice et quiete et ipsum vel suos in corporalem possessionem predictorum inducatis Hec autem omnia predicta vos omnes et singuli faciatis quam cito a dicto episcopo vel ab aliquo seu ab aliquibus mandatum super hoc habenti vel habentibus fueritis requisiti ita quod dictus episcopus nomine sue ecclesie Eduensis libere possit uti et pacifice jure quod ecclesie predicte de antiqua et approbata consuetudine extitit acquisitum In cujus rei testimonium litteris presentibus apposuimus sigillum nostrum Datum anno Domini MCC octogesimo secundo mense decembri