Charter Document - 02060205

A touz ceus qui verront cestes presentes lettres Guillaume Tibout garde de la prevosté d'Orliens salut Saichent tuit que honorable et discret Johan de Seint Verain des Bois arcediacre de Sauloigne en l'yglise d'Orliens establi par devant nous en droit reconnut que il a vendu otroié lessié quitté cessé et delessié par non de pure et de perfecte vente à touz jours mes à redoutable pere en Dieu Hugue evesque d'Ostum par la grace de Dieu ou non de la dite eveschié et à ses successeurs et à ceus qui auront cause de lui la moitié non devisée dou chasteau de Glaine et des apartenences assis sur la ville qui est apelée Verrières entre la cité d'Ostum et le chasteau de Molins les Engirbers soit en fiez en rerefiez justices seignories domaines hommes mesons terres prez bois rivieres estanz molins vignes tailles blaeries main morte questes censives coustumes corvées toutes dismes redevances rentes et quelques autres choses en quelque chose que ce soit apartenenz à la moitié dou dit chasteau que le dit Johan de Seint Verain avoit eu de mon seignour Girbau de Seint Verain chevalier son neveu por reson de pur et verai eschange d'autres choses que il avoit baillées au dit chevalier si comme il est plenemant contenu es lettres fetes dou dit eschange por le pris de trois mil et cinc cenz livres de tornois soves quites des quels IIIm Cc libres tornois le dit Johan de Seint Verain se tient enterignement a paié par devant nous en deniers seis nombrez Et renonça à ce que il ne poist jamis dire que la dite somme de deniers ne li eust esté baillée et livrée sauve ce que le dit Johan de Seint Verain ne vent pas sexante solz de Viennois de rente chascun an les quels il a donnez sur les dites choses vendues au chapistre de l'yglise d'Ostum por une messe de seint Esperit chanter chascun an tant comme il vivra et por fere son anniversere chascun an en l'eglise dou dit chapistre d'Ostum apres le decès dou dit Johan de Seint Verain qui seront à heritaige propre à touz jors mes au dit chapistre prometent le dit Johan de Seint Verain que il james en contre ceste vente et ceste quitance ne vendra ne assaiera a venir ne james es dites choses vendues ne en aucune d'iceles rien ne reclamera ne fera reclamer par soi ne par autre par aucun droit par reson d'eritaige de decevance de lesion ne de circonvencion ne par aucune autre cause ou reson Et trenzporta le dit Johan de Seint Verain ou dit evesque et en ses successeurs et en ceus qui auront cause de lui tout le droit de la seignorie la possession et la propriété de toutes les dites choses vendues et de chascune si que il ne retint nule rien Et promist le dit Johan de Seint Verain que il au dit evesque et à ses successeurs et à ceus qui auront cause de lui toutes les dites choses vendues et chascune d'iceles delivrera garentira et deffendra touz jors mes vers touz et contre touz à ses propres couz et despens aux us et aux costumes dou païs et se aucun ou aucuns sordoit ou sordoient plet au dit evesque à ses successeurs ou à ceus qui auront cause de lui des dites choses vendues ou d'aucune d'iceles le dit Johan de Seint Verain promist que si tost comme il li feroit à savoir il vendroit an jugemant ou hors jugemant et prendroit et recevroit tout le fes dou dit plet en soi et en garentiroit et deffendroit le dit evesque et ses successeurs et ces qui auront cause de lui et garderoit de touz couz et de touz domaiges Et quant à ces choses tenir garder acomplir et de non venir en contre le dit Johan de Seint Verain a obligé au dit evesque à ses successeurs et à ceus qui auront cause de lui et souzmis en la juridicion le Roi et de la prevosté d'Orliens soi ses hoirs et touz ses biens mobles et non mobles presenz et à venir ou que il soient Et renonça le dit Johan de Seint Verain quant à ces choses à toutes graces et à touz privileiges de croiz prise et à prendre à l'exception de tricherie de mal et en fet à la deception d'outre moitié de droit pris et à toute autre decevance à toute lesion et circonvencion à tout benefice de restitucion en enterin à toute aide de droit de canon et de lai à touz us coustumes establissemenz de païs et de leu à tout droit disent que renonciacion generau ne doie valoir se l'especial ne veit devant et à toutes autres exceptions allegations cavillations deffenses aides de fet de droit de leu de temps qui poissent estre dites ne obicées contre ces lettres et qui porroient aideir en cest cas au dit Johan de Sein Verain à ses hoirs à ses successeurs ou à ceux qui de lui auroient cause et nuire au dit evesque ou à ses successeurs ou à ceus qui auront cause de lui Et en tesmoing de ce et que ce soit ferme et estauble nous à la requeste dou dit Johan de Seint Verain honorable homme et discret avons scelé cestes presentes lettres dou seaul de la prevosté d'Orliens Ce fut fait l'an de Nostre Seignor mil deus cens quatre vinz et quatorze le lundi d'apres la feste seint Barnabé l'apostre J Aleaume