Charter Document - 02060199

A touz ceaus qui verront ces presentes lettres Estiennes Voussiz et Estiennes Apoloz gardiens dou seaul lou roi an la prevosté de Gyen salut an nostre Seignor Saichent tuit que an nostre presence por ce especiaulmant estaubliz Jehans de Seint Varain arcediaicres de Sauloigne an l'yglise d'Orliens et mes sires Gilbauz de Seint Varain sires de la Cele sur Loire ses niés ont cogneu an droit de loy bone volunté par devant nos que il ont eschangié an samble li uns à l'autre et pour terre de pur eschange baillié et livré li uns à l'autre les choses qui s'an siguent c'est à savoir li diz mes sires Gilbauz au dit mon seignor Jehan son honcle la moitié dou chasteaul de Glane non devisié assiz an l'aveschié d'Ostun movent de fiez dou dit avesque la moitié des apertenances dou dit chasteaul soit an justises seignorie demoignes terres prez vignes bois estans molins rivieres cens costumes homes de cors taillaubles et esploitaubles soit an blez deniers rantes redevances ou an autres choses quex queles soient fiez rerefiez ou autres choses et tout lou droit que il avoit an la dite moitié dou chastel et an la moitié des apertenances de sus dites por quel que raison que ce soit et doit li diz mes sires Gilbauz faire quitier à sa fame tout lou droit que elle ai ou dit chasteaul et es apertenances por doaire ou por quel que autre raison que ce soit Et li devanz diz mes sires Jehanz bailla et livra au dit mon seignor Gilbauz de Seint Varain chevaliers son nevou sa maison de la Roiche an Berriz de lez Sanceurre sans pris et douz cenz livrées de terre ou de rante de la monoie corranz ou pais an viron la dite maison au plus près à bailier et livrer et aseoir asise de terre au dit et au regart de mon seignour Jehanz dou Pré chevalier et de maistre Mile de Danzi chanoigne de ce mesme leu et an doit li diz mes sires Johanz faire recevoir à home lou diz mon seignour Gilbaut au conte de Sanceurre de cui fiez les choses devant dites sunt quittemant et paisiblemant sanz paier quinz denier ne rachat ceste foiz la quele chouse se il ne façoit il promist par devant noz que il li bailleroit sa maison de Moques sanz pris ou les IIe livrées de rante an viron au dit et au regart des persones de sus dites et sunt les covenances teles antre lou dit mon seignour Jehanz et lou dit mon seignour Gilbaut que se li avesques d'Ostun ne voloit recevoir à home lou dit mon seignour Jehanz de la dite moitié dou chasteaul et des apertenances de sus dites totes les covenances de sus dites seroient nulles et de nulle valour et promittrent les parties de sus dites que il ne vanroit gemais ne asceront à venir an contre les covenances de sus dites por aus ne por autrui ançois garantiront li uns à l'autre l'eschange de sus dit an vers totes genz an huz et an costumes dou pais et quant à totes ces choses garder fermemant sanz gemais venir an contre obligeai l'une partie à l'autre touz ses biens presens et avenir mobles et non mobles et se somittrent aus et touz lors hoirs et touz lors biens à la juridition de la prevoté de Gyen quel que part que il se translatoient et quel que part que lors biens soient et renoncèrent li diz mes sires Jehanz et li diz mes sires Gilbauz à totes exceptions barres dilatoires et perhemptoires de fait et de barat de troicherie de decepcion et de lesion à touz privileige doner et à doner à touz aide de droit et à toutes les raison que l'an porroit de fait ou de droit ou de costume proposer contre ces lettres Ou tesmonaige de la quel chose nos avons mis lou devant dit seaul an la dite prevoté an ces presentes lettres donées an l'an de grace nostre Seignor mil II quatre vinz et quatorze lou mardi après Pasques