Charter Document - 02060198

A touz ceaus qui verront ces presentes lettres Estenes Apolo et Estenes Voussiz gardes dou seaul de la prevosté de Gyen salut Saichent tuit que presanz an droit devant nos nobles hons mes sires Gilbaut de Seint Varein sires de la Ceille sur Loire chevaliers fist ordena et estaubliz son amé maistre Mile de Danzi chanoigne dou dit leu son atorne son procureour especiaul a soi devetir et desaisir en nom dou dit mon seignor Gilbaut et por lui de la moitié dou chasteaul de Glane et de la moitié des apertenances dou dit chasteaul movent dou fié mon seignor l'avesque d'Ostun et faire sassir et revestir mon seignor Johanz de Seint Varain arcediaicre de Sauloigne an l'yglise d'Orliens et de requerre mon seignour l'avesque devant dit de saisir et de retenir et de recevoir à home lou dit arcediaicre des chouses de sus dite et promist li diz mon seignor Gilbauz soz l'obligacion de touz ses biens avoir ferme et estauble et agreauble et tenir sanz jemais venir an contre tout ce qui sera fait ordené et procuré por lou dit maistre Mile son procureour devant dit an totes et an une chascune des choses de sus dites et nos an tesmoing de ceste chose avons seaulé ces presentes lettres dou seaul de la prevosté de Gyen Doné an l'an de grace mil et douz cenz et quatre vinz et quatorze lou mardi après Pasques