Charter Document - 02060180

A touz ces qui verront et orront ces presentes lettres je Guillaumes diz Sechauz chevaliers sires de Givardé fais savoir que cum je haie a proaige chascun an por chié de mon heritaige de mon propre alou an la ville de Bauge an la paroiche d'Yssi la moitié la taille telle cum mes sires li avesque la vuet faire icelle moitié de la dite ville et tout ce que je ai an la dite ville de Bauge prans an fié de mon seignor Girart por la graice de Deu avesque d'Ostun an nom de soi et de l'yglise d'Ostun et de ses successors por lou pris de XXX livres de Viennois les quex je ai receues an deniers nombrez de mon seignor l'avesque devant dit an tel manière que je suis tenuz et promet au dit avesque por soi et por ses successors ne poons ne devons prandre an fié ne an rierefié la devant dite chouse ainz an serons nos ou cil qui la tenront touz jours mais home de fié au dit avesque ou à ses successors avesques d'Ostun sanz nuns maien et sanz rière fié et li devons garantir lou dit fié et les choses desus dites par mon sairement doné sus l'evangile et sus touz mes biens Ou tesmoing de la quel chouse je ai fait metre an ces presentes lettres les seaus de honoraubles persones mon seignor Perron arcediacre d'Ostum et frère Guillerme priour de Seint Syphorien d'Ostum et nos arcediacres et priours devant dit à la requeste dou dit Guillerme chevalier avons mis nos seaus an ces presentes lettres ou tesmoing de vérité C'est fait et doné à Ostum lou diemange de la feste seint Mathé l'apostre l'an de grace mil CCLXX ou moys de septembre