Charter Document - 02060179

A touz ceaus qui verront ces presentes lettres je Phelippes de Borbon chevaliers sires de Mont Perroux fais à savoir que je tiens an fié lige sus touz autres seignours de mon seignour l'avesque d'Ostun ma maison de Mont Perroux jurauble et randauble et tout quantque je porte an la ville de Grueri soit an piaige ou an homes ou an tailles ou an queque chouses autres que ce soient quant au jour d'ui sauf lou més Marchier de Gegner que je hai a mon tamps conquis dou dit Machier et de ses anfanz de rechief lou piaige de Mont Palay et les homes que je hai conquis an la dite ville de Mont Palay et lor més et les apertenances de rechief touz mes homes que je hai à Dos Eschaules et lor més et les apertenances de rechief mes homes de Seveler et lor més et les apertenances de rechief les homes de Saujon et lor més et les apertenances de rechief lou piaige que je porte an la ville d'Yssi de grant chemin trespassent les homes que je hai à Villers et lor més et les apertenances des més et se ce estoit que mes sires l'avesques ou ses comandemenz trouvassent aucunes chouses obliées an ce dit fié je vuil et outroi que li mien lou tenissent an fié dou dit mon père l'avesque ausi cum les autres chouses qui sunt par desus devisiés sanz ce que je ou li mien n'an fuissiens pris à ochoison Ou tesmonaige de la quel chose je Phelippes devant diz ai donées à mon père devant dit l'avesque ces lettres pandanz saelées de mon seaul et ai prié et requis à home honorauble et saige à l'arceprestre de Borbon maistre Jehan et à maistre Pierre d'Ostun arceprevoire de Beaune que il meissent ansamble lor seaul an ces lettres et nos arceprestre devant dit à la requeste dou dit Phelippe avons mis noz seaus an ces lettres ou tesmoing de vérité Ce fut doné an l'an de l'incarnation mil CCLXX ou moys d'avril à Mont Perroux