Charter Document - 02060171

Universis presentes litteras inspecturis nos Hugo permissione divina episcopus Eduensis ex una parte et nos frater Guillermus prior prioratus de Barro Regulari Eduensis diocesis et nos conventus ejusdem loci ex altera notum facimus quod cum ecclesia de Brecis versus Sanctum Theobaldum et ecclesia de Chesseyo dicte diocesis et villa Sancti Dyonisii in Valle Cabilonensis diocesis ad nos prefatum episcopum pertineant que quidem villa cum suis possessionibus et pertinentiis prioratui beati Hylarii ejusdem Cabilonensis diocesis et possessionibus ejusdem prioratus propinca est et vicina et ideo nobis et successoribus nostris episcopis Eduensibus magis expediat habere dictum prioratum beati Hylarii quam ecclesias supradictas cum propter vicinitatem predictam nobis et nostris successoribus episcopis Eduensibus de dicto prioratu beati Hylarii ampliores fructus obvenire valeant in futurum quam obvenire possent de ecclesiis supradictis et dictus prioratus beati Hylarii cum suis possessionibus et pertinentiis ad nos priorem et conventum prefatos pertineant qui prioratus beati Hylarii a nostro prioratu de Barro multum distat dicte vero ecclesie cum suis possessionibus et pertinentiis sint nostro prioratui de Barro predicto propinque et vicine et ideo nobis et nostris successoribus magis expediat habere dictas ecclesias quam prioratum beati Hylarii predictum cum propter vicinitatem hujusmodi de dictis ecclesiis nobis et nostris successoribus majores fructus obvenire valeant in futurum quam obvenire possent de prioratu beati Hylarii supradicto ideo nos prefatus episcopus habito super hiis que sequuntur agendis cum nostro capitulo Eduensi et nos prior et conventus prefati inter nos diligenti tractatu attendentes in eis utilitatem nostram et successorum nostrorum modis omnibus procurari permutamus ad invicem ecclesias predictas cum prioratu beati Hylarii predicto videlicet spiritualitatem earumdem ecclesiarum cum spiritualitate ejusdem prioratus et temporalitatem earum cum temporalitate ipsius prioratus et ex causa permutationis hujusmodi nos prefatus episcopus predictis priori et conventui et eorum successoribus in perpetuum concedimus prefatas ecclesias cum suis appenditiis et pertinentiis juribus et possessionibus universis absque onere procurationis que nobis et successoribus nostris ab eisdem ecclesiis ratione visitationis debebatur item jus patronatus ecclesiarum predictarum ad nos pertinens et quicquid temporalitatis in dictis ecclesiis obtinemus et quod prior predictus qui modo est vel qui pro tempore fuerit cum predictas ecclesias vacare contingerit vel alteram earumdem nobis et nostris successoribus presentare possit ad curam dictarum ecclesiarum videlicet ad quamlibet earum unum de suis concanonicis de Barro personam ydoneam qui de cura plebis ipsarum ecclesiarum nobis et nostris successoribus respondeat et dicto priori de rebus ipsarum ecclesiarum temporalium rationem exhibeat competentem in ipsis ecclesiis instituendum a nobis et nostris successoribus ad presentationem prioris supradicti item quod dictis canonicis sic in dictis ecclesiis institutis a nobis ab intestato decedentibus dicti prior et conventus succedere valeant et bona que sic decedens habebit auctoritate propria occupare salvis et retentis nobis et nostris successoribus visitatione in dictis ecclesiis et qualibet earumdem et aliis juribus episcopalibus et sexaginta solidis monete currentis in Burgundia quos de annua censa debemus percipere de ecclesia de Brecis supradicta Et nos prior et conventus predicti ex causa permutationis predicte dicto domino episcopo et suis successoribus quittamus in perpetuum et concedimus prioratum beati Hylarii predictum cum suis appenditiis pertinentiis juribus et possessionibus universis et quicquid juris habemus in eisdem nos de ipsis de vestientes et dictum dominum episcopum investientes de eisdem per traditionem presentium litterarum Promittimus siquidem nos prefatus episcopus pro nobis et nostris successoribus predictis priori et conventui et nos prior et conventus predicti pro nobis et nostris successoribus per stipulationem sollempnem inter nos initam et contractam quod contra premissa vel premissorum aliquod non veniemus nec aliquid attemptabimus in futurum et ut premissa magis rata habeantur et firma nos Clarambaudus decanus et capitulum ecclesie Eduensis notum facimus universis quod nos omnia et singula supradicta prout superius sunt expressa volumus consentimus et etiam approbamus promittentes pro nobis et nostris successoribus priori et conventui supradictis quod contra premissa vel premissorum aliquod non veniemus nec aliquid attemptabimus in futurum et quia nos prefatus episcopus gerentes administrationem totius archiepiscopatus Lugdunensis sede Lugdunensi vacante auctoritate metropolitana legitime cognovimus in permutatione predicta et aliis supradictis modis omnibus procuratis utiliter episcopatus et ecclesie Eduensis dictarum ecclesiarum de Brecis et de Chesseyo ac etiam prioratuum predictorum predictam permutationem et omnia alia supradicta ut ea magis firma et rata habeantur auctoritate predicta confirmavimus In cujus rei testimonium nos prefatus episcopus sigillum nostrum et nos decanus et capitulum predicti sigillum beati Nazarii et nos prior et conventus sigilla nostra quibus utimur presentibus litteris apponimus Datum et actum anno Domini millesimo ducentesimo octogesimo octavo mense marcio