Charter Document - 02060170

Universis presentes litteras inspecturis ac eciam audituris Guillermus divina miseratione Cabilonensis episcopus salutem in eo qui est omnium vera salus Noveritis quod in nostra presencia propter hoc specialiter constitutus nobilis vir Philippus de Logiis domicellus sine vi et metu ad hoc inductus nec in aliquo circonventus confitetur coram nobis in jure et publice asserit se ex certa scientia et cum deliberatione diligenti prehabita obligasse tradidisse ac eciam concessisse et adhuc tradit et deliberat reverendo in Christo patri Hugoni Dei gratia Eduensi episcopo et suis successoribus pro ducentis libris Turonensium ipsi jam dicto Philippo quittis et sibi integre et perfecte solutis de quibus ducentis libris Turonensium supradictis se tenuit dictus Philippus coram nobis totaliter pro soluto ac eciam in solidum pro pagato res omnes et singulas inferius nominandas quas idem Philippus habet habere potest et debet qualicunque actione seu ratione et jure in finagio et territorio Sancti Dyonisii in Vallibus moventes de feodo predicti reverendi patris episcopi Eduensis videlicet domum suam de Sancto Dyonisio predicto cum appendiciis et pertinenciis ipsius domus universis item triginta solidos et quatuor bichetos avene et tres quartas frumenti et terciam partem unius quarte frumenti que debet Guillermus Berat de hiis que tenet ab ipso Philippo item triginta solidos Viennensium medietatem unius bicheti frumenti et quatuor bichetos avene et terciam partem unius quarte frumenti que debent Robertus et Hugonetus Miree item duodecim solidos unam quartam frumenti et terciam partem alterius quarte frumenti et duos bichetos avene que debent Robertus et Picardus fratres item viginti solidos unam quartam frumenti et quartam partem unius boisselli et quinque quartas avene que debet Johannetus de Rosers item tres solidos unam quartam avene que debent Girardus et Guillermeta item quinque solidos unum boissellum frumenti et tres boissellos avene que debet dictus Grivoz item decem solidos Viennensium unum boissellum frumenti et tres partes alterius boisselli frumenti et tres boissellos avene que debet Omeenigne item decem solidos et unum bichetum avene et quatuor sextarios vini que debet Johannetus filius dicti Ovre an Vigne que omnia et singula predicta debet dictus Johannetus racione costume predicto Philippo item tres solidos et sex denarios censuales et decem gallinas que debent supradicti homines et sciendum est quod quilibet predictorum hominum qui tenet focum et locum debet tres corveyas et unum charrerium quem debent predicti homines qui habent boves aut alia animalia de quibus possint quadrigare et debetur eis ad manducandum item duos bichetos et unam quartam avene et unam gallinam que debet Guillermus Regis et terciam partem de duobus sextariis olei et unam gallinam que debet Galterus nepos ejus item unam quartam avene et terciam partem de duobus sextariis olei que debet Petrus frater dicti Guillermi item tres boissellos avene et unam gallinam que debet dictus Symarz item vineam suam de li Boreaul estimatum ad opus triginta operatarum item quintam partem vinearum de Ruyssillo de Chante Perdeiz item quartam partem vinearum de Arsiaco de Boucheto item medietatem prati de Alta Rippa item quatuor denarios sitos super molinum Que omnia et singula supradicta prout superius sunt expressa predictus Philippus confitetur coram nobis movere et esse de feodo reverendi patris episcopi Eduensis racione predicte ecclesie Eduensis devestiens se predictus Philippus coram nobis de predictis et ipsum reverendum patrem investiens tradicione presentium litterarum corporaliter vel quasi de eisdem volens concedens dictus Philippus quod dictus reverendus pater Eduensis episcopus et sui successores in dicta Eduensi ecclesia predictas res omnes et singulas teneant possideant et habeant pacifice et quiete fructus percipiant et suos faciant ad modum rerum feodalium prout moris et juris est ipsos tenere et possidere quousque fuerit de predictis ducentis libris Turonensium plenarie ac in solidum satisfactum Promittit insuper dictus Philippus per juramentum suum super sancta Dei evangelia corporaliter prestitum stipulatione sollemni interposita necnon et sub expressa obligatione omnium bonorum suorum mobilium et immobilium quocunque sint omnia et singula tenere et inviolabiliter observare et contra omnes homines libere et quiete garentire deffendere tenere in pace et non venire contra predicta vel aliquid de predictis per se vel per alium in judicio vel extra judicium nec contravenire volenti in aliquo consentire Immo promittet dictus Philippus per jam prestitum juramentum et sub obligatione predicta specialiter garentire contra uxorem suam et quod procurabit et faciet erga ipsam quod ipsa in predictis consentiet ac eciam concordabit renunciat insuper in hoc facto dictus Philippus ex certa scientia et per juramentum suum jam prestitum omnibus exceptionibus [] Datum anno Domini MCC nonagesimo mense martii