Charter Document - 02060164

Universis presentes litteras inspecturis abbas Sancti Petri Cabilonensis abbas Maceriarum et officialis Cabilonensis salutem in Domino Noverit universitas vestra quod cum causa seu discordia verteretur inter nobilem virum Guillermum dominum Montis Acuti domicellum ex una parte et venerabilem patrem Girardum Dei gratia episcopum Eduensem ex altera super eo videlicet quod dictus Guillermus dicebat se habere dominium et justitiam in villa Sancti Dionisii in Vallibus quod dominium et justitiam dictus Guillermus petebat a prefato episcopo sibi in pace dimitti tandem bonis viris mediantibus super ista causa seu discordia pacificatum amicabiliter extitit ac etiam concordatum in hunc modum videlicet quod dictus Guillermus quitat penitus et precise in perpetuum sine reclamatione aliqua decetero facienda predicto episcopo et ejus successoribus qui pro tempore fuerint omne jus quod habebat vel habere poterat ac debebat omnimoda ratione seu quoquomodo in predicta villa Sancti Dionisii in Vallibus in appenditiis pertinentiis dicte ville videlicet in hominibus tenementis eorumdem terris pratis nemoribus aquis censibus costumis talliis servitutibus dominio justitiis magnis et parvis et rebus universis quibuscumque que omnia supradicta et singula prefatus episcopus seu episcopus Eduensis qui pro tempore fuerit in perpetuum tenebit pacifice et quiete Et sciendum quod dictus Guillermus in nostra presentia propter hoc constitutus providus ac spontaneus recognoscit coram nobis se accepisse in perpetuum feodum a predicto episcopo villam de Lusigneio juxta Sautronam cum appenditiis et pertinentiis dicte ville et se homagium et fidelitatem de predicta villa et appenditiis et pertinentiis ejusdem ville prefato episcopo jam fecisse se et heredes suos qui pro tempore fuerint domini Montis Acuti specialiter obligando quod ipsi prefato episcopo seu episcopo Eduensi qui pro tempore fuerit facient homagium et fidelitatem de predicta villa de Lusigneio et appenditiis et pertinentiis ejusdem ville prout successerint de herede in heredem et si contingeret quod absit dictum Guillermum vel heredes suos sive successores dominos Montis Acuti dictam villam de Lusigneio cum appenditiis et pertinentiis ejusdem ville vendere alienare aut extra manum suam ponere ipsi ex tunc in recumpensationem predicte ville de Lusigniaco et appenditiarum et pertinentiarum ejusdem quadraginta libratas terre ad Divionensem in sua propria terra nulli alii in feodum obnoxie assedere et assignare tenerentur quas quadraginta libratas terre tenerent a prefato episcopo sive episcopo Eduensi qui pro tempore fuerit in feodum prout superius est expressum et de eis homagium dicto episcopo vel ejus successoribus facere tenerentur ita quod quicumque fuerit dominus Montis Acuti quadraginta libratas terre nulli alii obnoxie tenebit in feodum ab episcopo Eduensi qui nunc est vel successoribus ejus nec dictus Guillermus seu domini Montis Acuti qui pro tempore fuerint dictam villam cum appenditiis ejusdem seu quadraginta libratas terre supradictas ponere poterunt in manibus alienis et dictus episcopus vel ejus successores a se feodum alienare non poterunt antedictum Dictus autem episcopus dedit prefato Guillermo quater centum libras Divionensium quas dictus Guillermus recognovit coram nobis se habuisse et recepisse in pecunia legittime numerata ab episcopo supradicto Hanc autem pacem et concordiam predicte partes ratam et gratam habuerunt coram nobis promisit autem dictus Guillermus per juramentum suum corporaliter prestitum se dictam pacem et concordiam in perpetuum firmiter tenere et inviolabiliter a se et suis observare abrenuntiavit autem dictus Guillermus pro se et suis omni exceptioni et omnis juris beneficio que vel quod sibi vel suis possent in posterum competere vel prodesse voluit insuper et concessit dictus Guillermus quod nos officialis Cabilonensis vel ille qui pro tempore officialis Cabilonensis fuerit in dictum Guillermum vel successores suos monitione premissa ad requisitionem dicti episcopi vel ejus successorum ad quemquemque locum se transferrent excommunicationis sententiam proferamus si eum vel eos contra premissa quod absit venire contingerit vel aliquid premissorum In cujus rei testimonium nos abbates et nos officialis supradicti ad preces et requisitionem dicti Guillermi presentibus litteris sigilla nostra apposuimus Actum anno Domini millesimo ducentesimo sexagesimo mense octobri