Charter Document - 02060159

Universis presentes litteras inspecturis nos Robertus dux Burgundie notum facimus quod cum sententia diffinitiva super inquestis factis per curiam Regis Francie tam pro nobis quam pro venerabilibus viris decano et capitulo Eduensi et eorum ecclesia in presenti parlamento per ipsam curiam lata non fuerit nos promittimus per juramentum nostrum super sancta Dei evangelia corporaliter prestitum quod nos procurabimus per nos et amicos nostros quod dicta sententia in instanti parlamento Penthecostes nisi demandatum fuerit et si fuerit demandatum in proximo parlamento subsequenti feretur et quod nos quin feratur non impediemus nec impediri faciemus per nos vel per alios facto vel verbo aut consensu et si contingat quod absit quod dicta sententia diffinitiva super dictis inquestis de instanti parlamento Penthecostes vel in alio proximo subsequenti si instans parlamentum Penthecostes fuerit demandatum non ferretur volumus et concedimus quod consensus habitus vel habendus a reverendo in Christo patre Jacobo Dei gratia Eduensi episcopo dictisque decano et capitulo Eduensi presbiteris clericis et subditis eorumdem episcopi decani et capituli sive sint persone ecclesiastice sine seculares super moneta nostra et confectione monete nostre immobilis eisdem vel alteri personarum non noceat nec absit et pro nobis non competat neque prosit et quod reverendi in Christo patres archiepiscopus Senonensis et episcopus Autissiodorensis judices seu executores super negocio immutabilis monete nostre a sede apostolica deputati per litteras apostolicas sibi directas vel virtute aut pretextu earumdem dictos episcopum decanum et capitulum Eduenses presbiteros clericosque et alias personas tam ecclesiasticas quam seculares eisdem subjectas non possint nec debeant compellere ad decimam nobis prestandam nec ad alia que in littera nobis concessa continentur nec a nobis exigendam ab eis secundum quod in litteris apostolicis nobis concessis super hoc plenius continetur Et supplicamus et rogamus dictos judices ut ipsis predictis decano et capitulo Eduensi donent et tradant suas litteras suis sigillis sigillatas in suis litteris toto tenore hujusmodi litterarum nostrarum expressarum quod non compellent ipsos vel aliquem ipsorum ad prestationem decime nobis vel aliis nostro nomine faciendam donec dicta sententia lata fuerit ac etiam sigillata et eisdem decano et capitulo aut eorumdem procuratori tradita ac etiam deliberata et ad omnia predicta et singula tenenda servanda et complenda nos et ducatum nostrum et omnia bona nostra specialiter obligamus Volumus autem et consentimus quod si contra premissa vel aliqua premissorum veniemus tacite vel expresse per nos vel per alium reverendi patres nostri compellant et compellere possint per censuram ecclesiasticam et terram nostram supponere interdicto ecclesiastico auctoritate ordinaria seu etiam delegata quorum juridictioni quo ad hoc nos et nostros et terram nostram supponimus et dictam jurisdictionem eorum tam ordinariam quam etiam delegatam in ipsis quantum in nobis est quo ad hoc prorogamus In cujus rei testimonium sigillum nostrum presentibus litteris duximus apponendum Datum anno Domini MCC octogesimo quarto die mercurii post festum beati Barnabe apostoli