Charter Document - 02060141
| Charter Number: | 02060141 |
|---|---|
| Cartulary Title: | Cartulaire de l'Evêché d'Autun |
| Charter Language: | Latin |
| Charter Origin: | Religious |
| Charter Type(s): | Concession |
| Date: | 1256 |
| Date type: | Internal, A.D. |
| Resource Link(s): |
Archives départementales de Saône-et-Loire - G 443 (p.87) |
Charter:
Nos Girardus Dei gratia Eduensis episcopus decanus et capitulum Eduense notum facimus universis presentes litteras inspecturis quod cum discordia verteretur inter nos ex una parte et viros religiosos abbatem et conventum beati Martini Eduensis ex altera super subjectione monasterii supradicti et juribus episcopalibus tandem de consensu nostro et eorumdem abbatis et conventus amicabilis composicio et ordinatio intervenit que in aliis litteris inde confectis continetur et propter dictam composicionem et ordinationem Guillermo abbati dicti monasterii concessimus et eidem bona fide promisimus quod ipso Guillermo dicti monasterii abbate existente nos episcopus Eduensis vel episcopus Eduensis qui pro tempore fuerit dictos abbatem et conventum visitare corrigere reformare et in dicto monasterio inquirere non possumus nec debemus salvis nobis et successoribus nostris et eisdem abbati et monasterio omnibus aliis que in litteris dicte composicionis et ordinationis continentur non obstantibus litteris super dicta composicione et ordinatione a sede apostolica impetratis vel etiam impetrandis Cum autem dicta composicio et ordinatio statuta et ordinata a Sede apostolica fuerit presentes litteras dicto abbati innovabimus fideliter prout sibi fuerit opportunum et eidem melius videbitur expedire Hec autem que premissa sunt dicti abbato bona fide facere pariter et observare promittimus In cujus rei testimonium presentes litteras sepedicto Guillermo abbati tradidimus sigillorum nostrorum munimine roboratas Datum et actum Edue anno Domini MCC quinquagesimo sexto mense marcio