Charter Document - 02060139

Universis presentes litteras inspecturis nos Girardus divina miseratione Eduensis episcopus et nos Guillermus decanus et capitulum ecclesie Sedelocensis Eduensis dyocesis notum facimus quod cum discordia verteretur inter nos episcopum Eduensem prefatum ex una parte et nos decanum et capitulum Sedelocense ex altera super eo videlicet quod nos decanus et capitulum predicti dicebamus asserebamus et proponebamus contra predictum dominum episcopum Eduensem quod summas pecuniarum nobis capitulo predicto impositas a venerabili in Christo patre domino Symone Dei gratia titulo Sancte Cecilie presbitero cardinali apostolice sedis legato in regno Francie ratione procurationum ipsius legati cardinalis pro anno presenti et aliis annis precedentibus et alias impositiones pecuniarum vel victualium nobis capitulo predicto in posterum faciendas a cardinali legato et aliis cardinalibus legatis utentibus legationis officio in regno Francie ratione procurationum ipsorum cardinalium legatorum idem dominus episcopus Eduensis qui nunc est et alii episcopi Eduenses qui pro tempore fuerint tenentur solvere pro nobis capitulo supradicto nobis Girardo predicto episcopo Eduensi in contrarium dicentibus et asserentibus pro nobis et successoribus nostris episcopis Eduensibus quod non tenebamur nec tenemur solvere pro dictis decano et capitulo Sedelocensi procurationem seu impositionem supradictam Tandem mediantibus inter nos bonis viris compromisimus unanimiter ambe partes super dicta discordia et controversiis in viros venerabiles et discretos videlicet in dominum Girardum decanum Lingonensem et dominum Jacobum de Rocha prepositum Eduensem tanquam in arbitros arbitratores seu amicabiles compositores qui dictam discordiam sue controversiam possint et valeant infra mediam quadragesimam proximam pace vel concordia de consensu tamen nostrarum ambarum partium vel infra proximum festum Penthecostem judicio terminare et partes ac quos expedire viderint citare coram ipsis Nos vero predicte partes rationes nostras juris et facti tenemur in scriptis tradere infra festum Purificationis beate Marie Virginis arbitris memoratis promittentes bona fide nos ambe partes et sub pena centum librarum Turonensium a parte non servante pacem concordiam vel compositionem judicium seu arbitrium predictorum parti observanti promissarum ac etiam solvendarum ipsa pace vel concordia vel compositione judicio prolatione seu arbitrio predictorum decani et prepositi rato firmo et stabili nichilominus permanente pro nobis et successoribus nostris tenere servare et adimplere quicquid predicti arbitri arbitratores seu amicabiles compositores super dicta discordia seu controversia dixerint infra dictos terminos pace vel judicio secundum quod supradictum est ordinandum judicandum aut amicabiliter componendum Si vero predicti duo arbitri non possent aut nollent in unum concordare ipsi predictum negocium totaliter et illud in quo discordarent venerabili in Christo patri domino Symoni legato in Francia infra proximum festum Nativitatis beati Johannis Baptiste in scriptis referent fideliter et remittent qui dominus legatus examinato negocio predictam discordiam judicio terminabit Ne vero nos decanus et capitulum predicti ac etiam ecclesia nostra Sedelocensis supposita propter impositionem procurationum domini Symonis anni presentis et aliorum annorum precedentium nobis factam ecclesiastico interdicto ulterius nostro debito et devoto servicio defraudemur nos decanus et capitulum antedicti vadia seu pignora nostra posuimus et obligavimus pro tota impositione dictarum procurationum domini Symonis supradicti in manibus collectorum procurationum dicti domini Simonis nobis facta prius tamen in hoc a nobis protestatione quod dicta pignoris obligatio seu traditio non possit nobis decano et capitulo predictis nec ecclesie nostre Sedelocensi aliquid dampnum seu prejudicium generare in futurum si contingat nos in dicta discordia seu controversia contra dictum dominum episcopum obtinere Et nos similiter prefatus episcopus Eduensis vadia seu pignora nostra posuimus et obligavimus pro tota dicta impositione dictarum procurationum in manibus dictorum collectorum pro qua impositione erat predicta Sedelocensis ecclesia interdicta donec per dictos arbitros aut per dictum dominum Symonem predicta discordia [] dictum est sopiatur prius tamen a nobis similiter protestatione facta quod dicta nostri pignoris obligatio seu traditio non possit nobis nec successoribus nostris Eduensibus episcopis prejudicare in futurum si contingat nos super discordia inter nos et dictos decanum et capitulum habita prevalere In quorum testimonium nos prefatus episcopus Eduensis et nos predictus decanus sigillum nostrum nos vero predictum capitulum quia sigillum non habemus sigilla virorum venerabilium domini Guillermi archidiaconi Avalonensis et magistri Petri cantoris Sedelocensis concanonicorum nostrorum presentibus litteris apposuimus et apponi fecimus in robur et testimonium premissorum Datum anno Domini MCC septuagesimo septimo mense januario