Charter Document - 02060132

Universis Christi fidelibus presentes litteras inspecturis seu etiam audituris Girardus Dei gratia Eduensis episcopus et Johannes dominus Castri Villani Luziaci et Sinemuri miles Eduensis dyocesis rei geste noticiam cum salute Pia devocione fidelium attendentes quod ad instar illius superne civitatis Jherusalem in hac ecclesia militante dominus Jhesus Christus augmentato divine laudis jubilo et multiplicatis servitoribus glorietur cujus laudem et gloriam peroptamus toto devocionis affectu nostris temporibus augmentari nos in parochiali ecclesia beati Hylarii Sinemuri Briennensis predicti cujus jus patronatus et collatio ad nos predictum episcopum dignoscitur pertinere volentes et cupientes divine laudis organum inperpetuum propagari de communi voluntate nostra consensu unanimi et assensu volumus statuimus et etiam ordinamus quod in predicta parrochiali ecclesia beati Hylarii Sinemuri Briennensis tresdecim canonici statim fiant et instituantur et quindecim prebende quorum tresdecim canonicorum unus erit decanus dicti loci alius cantor alius sacrista qui decanus duarum fructus habebit et percipiet prebendarum cantor vero habebit et percipiet unius et dimidie prebende et sacrista similiter unius et dimidie prebende percipiet et habebit Alie vero prebende aliis singulis canonicis ibidem instituendis pro tempore assignabuntur equaliter cum fructibus earumdem Decanus autem dicti loci ab ipso capitulo dicti loci in posterum eligetur et electus nobis dicto episcopo et aliis episcopis Eduensibus qui pro tempore fuerint presentabitur et ad nos prefatum episcopum et alios episcopos Eduenses successores nostros ipsius decani confirmatio aut infirmatio canonica pertinebit Institutio autem aliorum canonicorum dicti loci et collatio prebendarum ad nos prefatum episcopum et alios episcopos Eduenses qui pro tempore fuerint pro dimidia parte et ad nos predictum Johannem dominum Sinemuri Briennensis et successores nostros dominos Sinemuri qui pro tempore fuerint pro alia dimidia parte similiter pertinebit Facta autem institutione dictarum canonicorum et assignatione prebendarum nos prefatus episcopus Eduensis prebendam primo ibidem vacaturam conferemus et nos predictus Johannes aliam sequentem prebendam post ipsam proximo vacaturam et sic deinceps nos prefatus episcopus et successores nostri episcopi Eduenses et nos predictus Johannes et successores nostri domini Sinemuri Briennensis predicti vicissim dictas prebendas secundum quod eos vacare contigerit conferimus Sane decanus dicti loci qui pro tempore fuerit correctionem et curam dictorum canonicorum habebit Ad prefati nostri autem voti desiderium salubriter adimplendum nos prefatus Johannes dominus Sinemuri pro anime nostre et antecessorum nostrorum animarum remedio et salute damus et concedimus imperpetuum eidem ecclesie Sancti Hylarii decano et canonicis ibidem instituendis plenariam legittimam et liberam facultatem acquirendi et accrescendi se in castro nostro de Sinemuro predicto infra terminos inferius annotatos videlicet a porta nostra castri nostri de Sinemuro Briennensi adherente domui clericorum de Sinemuro usque ad aliam portam dicti castri per quam itur ad domum domini Hugonis Morelli militis prout directe itur de una porta predicta ad aliam portam dicti castri et a dicto itinere a parte ecclesie prout ambitus murorum dicti castri ab una porta ad aliam portam dictarum portarum per circuitum se ostendit ad faciendum ibidem cymiterium infra terminos limitatos necnon ad construendum et faciendum ibidem domos edificia et alia que sibi viderint expedire sine tamen prejudicio reddituum nostrorum dicti castri et juridictionis nostre retenta eciam nobis et nostris in dicto loco magna et parva justicia exceptis sacris locis qui gaudent immunitate ecclesiastica et personis ecclesiasticis in quibus nullam justiciam seu jurisdictionem habemus reservato eciam nobis et nostris quod nos possimus munire predictum castrum nostrum infra predictum ambitum quotienscumque necessarium fuerit et viderimus expedire Damus insuper et concedimus imperpetuum dicte ecclesie Sancti Hylarii decano et canonicis ibidem instituendis viginti libras Turonensium annui redditus in villa seu castellania aut baronia Sinemuri Briennensis ad arbitrium bonorum virorum proborum francas et liberas assignandas et eciam assidendas aut tantum pecunie unde poterunt viginti libre annui redditus a dictis decano et canonicis acquiri libere et haberi Damus eciam et concedimus ipsi ecclesie Sancti Hylarii decano et canonicis instituendis in eadem liberam facultatem acquirendi et accrescendi in feodis retrofeodis et dominiis nostris in baronia nostra seu castellania de Sinemuro existentibus usque ad summum ducentarum librarum Turonensium annui redditus ita tamen quod quicquid ipsi acquirerent in predictis locis de bona garda nostra et successorum nostrorum dominorum Sinemuri imperpetuum remaneat et quod ipsi in singulis locis in quibus ipsos acquirere contigerit feodum ex integro non acquirant Damus eciam et concedimus imperpetuum ipsi decano et canonicis instituendis ibidem jus piscandi per se vel per familiam suam ad opus hospiciorum suorum in fluvio Ligeris in quantum justicia et juridictio nostra se extendit in castellania nostra Sinemurensi retento nobis et nostris successoribus dominis Sinemuri magno pisce quod ad nos ratione dominii pertinere consuevit Profecto ut inter nos et successores nostros dominos Sinemuri Briennensis et prefatos decanum et canonicos dicti loci major consideratio dilectionis sinceritas et securitas in posterum observetur et ut nos et nostri ob hanc causam dictum locum et prefatos decanum et canonicos majoris fraternitatis affectis recommendatos habeamus dicti decanus et canonici qui pro tempore fuerint et instituentur ibidem nobis predicto domino Sinemuri et successoribus nostris dominis Sinemuri fidelitatem jurabunt Nos insuper prefatus episcopus Eduensis ut tam pius devotionis affectus prefati domini Johannis militis melius et ulterius valeat affectui mancipari prefatam ecclesiam Sancti Hylarii et ecclesiam Sancti Martini de Valle subtus dictum castrum Sinemuri ipsi decano et canonicis in dicta ecclesia Sancti Hylarii instituendis damus et concedimus ad perfectionem augmentationem fundationem et institutionem prebendarum predictarum et ipsas ecclesias eisdem prebendis unimus ita quod ecclesia Sancti Martini erit capella de cetero dependens a dicta ecclesia Sancti Hylarii Sinemuri et cura utriusque ad dictam ecclesiam Sancti Hylarii in solidum pertinebit Volumus eciam et concedimus quod in dicta ecclesia Sancti Hylarii et circa ipsam cymiterium fiat et quod ibidem quilibet possit si voluerit suam eligere sepulturam et ibidem libere sepeliri Volumus eciam et concedimus quantum in nobis est quod omnes redditus exitus et proventus possessiones et bona tam clericis de Sinemuro Briennensi in elemosinam collata quam ab ipsis communiter acquisita ad fundationem augmentationem et institutionem dictarum prebendarum cedant et eisdem prebendis imperpetuum uniantur In dicta vero ecclesia Sancti Martini predicti ex causa poterunt illi de parrochia baptizari et eciam sepeliri retenta tamen nobis episcopo predicto et successoribus nostris episcopis Eduensibus in dicta ecclesia Sancti Hylarii procuratione nostra semel in anno ratione visitationis Nos vero Guillermus de Verduno decanus et capitulum Eduense omnia et singula supradicta volumus laudamus gratificamus ac eciam approbamus et eisdem expresse consentimus In cujus rei memoriam et testimonium nos prefati episcopus Eduensis Johannes dominus Castri Villani Luziaci et Sinemuri Briennensis necnon decanus et capitulum Eduenses sigilla nostra presentibus litteris apposuimus Actum et datum anno Domini MCC septuagesimo quarto mense aprilis