Charter Document - 02060128
| Charter Number: | 02060128 |
|---|---|
| Cartulary Title: | Cartulaire de l'Evêché d'Autun |
| Charter Language: | Latin |
| Charter Origin: | Lay |
| Charter Type(s): | Foundation |
| Date: | 1274 |
| Date type: | Internal, A.D. |
| Resource Link(s): |
Archives départementales de Saône-et-Loire - G 443 (p79) |
Charter:
Universis presentes litteras inspecturis ego Guillermus de Domiciaco domicellus filius condam nobilis viri Guidonis domini de Domiciaco militis notum facio quod cum vir venerabilis Yvo de Verzeliaco canonicus Cartonensis necnon vir nobilis Guido condam dominus de Domiciaco avus meus quilibet eorum unam capellaniam fundasset in ecclesia sancti Leodegarii de Domiciaco in suorum et predecessorum suorum remissionem peccatorum et ad Dei servicium et honorem videlicet predictus Yvo sub istis conditionibus quod collacio istius capellanie quam fundavit in ecclesia supradicta ad ipsum Yvonem quamdiu viveret ac deinceps ad Guidonem de Edua militem et Hervinam uxorem suam necnon ad Guidonem filium eorum primogenitum patrem meum quamdiu dicte persone viverent pertineret et predictus Guido de Edua miles condam avus meus sub istis conditionibus videlicet quod ad ipsum Guidonem et Hervinam uxorem suam necnon et Guidonem filium eorumdem primogenitum dicte capellanie a dicto Guidone fundate quamdiu viverent collatio pertineret quibus conditionibus in utriusque capellanie fundatione positis et adjectis existentibus et impletis quod predictarum capellaniarum collatio pertineret imperpetuum pleno jure ad venerabilem in Christo patrem episcopum Eduensem qui esset pro tempore episcopus Eduensis prout hec omnia et singula in litteris bone memorie Anselli condam episcopi Eduensis plenius continetur Ego predictus Guillermus de Domiciaco domicellus confiteor spontanea voluntate et ex certa scientia recognosco conditiones appositas et adjectas in utriusque capellanie fundatione quantum ad collationem earum penitus extitisse et ex nunc in antea dictarum capellaniarum collationem ad episcopum Eduensem qui pro tempore fuerit plenius pertinere et ipsum jus habere conferendi quotienscumque ad id obtulerit se facultas aliis conditionibus appositis et adjectis in fundatione dictarum capellaniarum in suo robore duraturis Confiteor etiam me et heredes meos et successores ex nunc in antea in collationem dictarum capellaniarum jus aliquod non habere sed plenum jus conferendi ut dictum est ad quemcumque episcopum Eduensem totaliter pertinere Promittens per juramentum meum tactis sacrosanctis evangeliis contra confessionem hujusmodi non venire In cujus rei testimonium sigillum meum presentibus litteris apposui et rogavi virum venerabilem patrem officialem Eduensem ut sigillum curie Eduensis una cum sigillo meo presentibus litteris apponat Et nos predictus officialis ad preces et mandatum dicti Guillermi sigillum curie Eduensis presentibus litteris apposuimus in testimonium veritatis Actum anno Domini MCC septuagesimo quarto mense octobri