Charter Document - 02060125

Omnibus presentes litteras inspecturis nos Johanna abbatissa et conventus de Requie beate Marie que vulgariter dicitur de Marceille Eduensis dyocesis eternam in Domino salutem Notum facimus universis quod cum nos in predicto loco de Marceille minus fertili multum sicco atque propter sittum loci ipsius religioni minus apto sustineremus incommoditates non modicas et intolerabiles evidenter venerabili patri nostro in Christo ac venerando domino Girardo Dei gratia Eduensi episcopo significavimus incommoditates nostras predictas nostre ecclesie inter quas eidem dignum duximus declarandum quod propter raritatem nemorum et lapidum et ipsius loci inhabilitatem ad edificandum tam pauca et pauperrima essent ibi edificia quod insuffisiencia quin pocius habitationi nostre penitus inutilia merito possent dici Addidimus etiam sine falsitatis vicio significationi predicte quod aque tantus esset deffectus ibidem quod ut de hiis que coquine et domus mundicie sunt necessaria taceamus aquam ex rivulo non parum a loco distanti delatam putridam et infectam ex fervido calore estatis pluries siti urgente bibere cogeremur Qua de causa prefatum venerabilem patrem episcopum Eduensem rogamus humiliter et devote quatinus locum hujusmodi commoditatibus non carentem videlicet locum domum et possessiones leprosorum de Sarcea sue dyocesis cum omni emolimento et honere eorumdem nobis ad edificandum et habitandum et transferendum nos ibidem pro inopia et incommoditatibus hujusmodi sublevandis ex paterna providencia religionis obtentu ac pietatis intuitu concedere dignaretur Idem vero pater venerabilis ductus pietate nostre miserie compaciens de venerabilis patris Guidonis Autissiodorensis episcopi et aliorum honorum consilio dicta locum et domum de Sarcea ac ejus possessiones inferius nominandas cum omni emolimento et honere eorumdem nobis concessit ita tamen quod nos et quecumque in dicto loco de Sarces nobis successerint tenemur imperpetuum leprosos de dicta villa et parrochia qui in dicto loco sunt vel pro tempore fuerint in dicta parrochia recipere et eisdem locum et domum ad habitandum congrua infra metas ejusdem parrochie cum omnibus necessariis congrue ministrare juxta ipsius venerabilis patris et successorum suorum episcoporum Eduensium qui pro tempore fuerint ordinationem pariter et mandatum et eidem reverendo patri episcopo Eduensi et ejus successoribus subjectionem plenariam obedientiam et reverentiam sine aliqua contradictione imperpetuum exhibere ac eisdem in omnibus que ad legem juridictionis ordinarie et diocesane pertinent pleno jure subesse ita quod ipse et ejus successores habeant imperpetuum in nos et illas que in dicto loco de Sarces pro tempore fuerint visitationem correctionem reformationem et omnia alia que ad dictam jurisdictionem pertinent et poterunt pertinere Hec autem volumus et concedimus abrenunciantes spontanee non circumvente nec coacte omnibus privilegiis et indulgenciis ordinis Cisterciensis et nobis concessis a sede apostolica vel ipsius legatis et etiam quibuslibet litteris impetratis et etiam impetrandis que nos possent contra predicta juvare vel nobis contra predictum venerabilem patrem Eduensem et ejus successores prestare subsidium vel afferre Si vero quod absit deficeremus in aliquo predictorum videlicet in receptione leprosorum de dicta parrochia vel habitationis congrue aut necessariorum administratione seu rebelles contra dictas leges existeremus in aliquo volumus et concedimus quod idem venerabilis pater vel successores ejus qui pro tempore fuerint possint dictis leprosis assignare tanquam jus et proprietatem ipsorum etiam nobis contradicentibus et invitis dicta locum et domum de Sarces et possessiones inferius nominatas cum omni incremento et melioratione eorumdem et a nobis aufferre ac in eos transferre et in eorum usum quantum ad dominium et possessionem sicut ante istam concessionem predictam pacifice possidebant pleno jure transferre Possessiones vero dicte domus de Sarces tales sunt primo dicta domus habet terras arabiles ad unam carrucam in finagio de maigniaco et de Sauvigniaco item habet prata ad duodecim carras feni in eadem finagio item habet quatuor arpenta nemorum desuper ipsam domum item habet sexaginta operatas vinearum in monte de Vasy et quindecim operatas in monte d'Estables et sexdecim operatas in monte de Ponte Alberti item habet quatuor solidos de censu in burgo de Avalone et unam domum in castro de Avalone In cujus rei testimonium et ut perpetuam obtineat firmitatem nos predicta abbatissa et conventus sigillum supradicti venerabilis patris Guidonis Dei gracia Autissiodorensis episcopi et sigillum venerabilis viri officialis Autissiodorensis presentibus litteris rogavimus et procuravimus apponi una cum sigillo nostro presentibus eisdem appenso Datum anno Domini MCC quinquagesimo sexto mense mayo