Charter Document - 02060117

Je Jehans sires de Chatoillon an Bazois fais à savoir à touz ceaus qui verront ces lettres que je ai pris en guaiges de Hugon seignour de Neublins de Estevenot son fil et de Marguerite sa fame et ma seror la moitié dou chastel de Glane et des apertenances por VIe livres de Viennois an la valour de dix uittains à Parisis les quex VIe livres je lor ai paiés en tel meniere qu'il poent reimbre de moi dès feste touz sains an là de VIe livres en la devant dite valour toutes les foiz qu'il voudront et suis tenuz de garder la terre et les sergenz bien et leaumant et suis tenuz de deffendre à mon pooir que nuns ne face forteresce novelle an tote la chastelerie de Glane tant cum je la tiendra por ceste guagere et se je metoie rien an ovre dou chastel de Glane li diz Hugues Estevenoz et Marguerite sunt tenu de rendre ne moi ne ès miens rien que je i mete à l'amandement dou dit chastel et que ce soit ferme et estauble je ai X chevaliers mis an ploige en la main au dit Hugon Tevenot et Marguerite c'est à savoir Girart de Vareigni Hugon Coquin Hugon Parcevaul Guillaume Moart Pierre lou proost de la Roiche Pierre Coquin Guion lou Borgoin Pierre de Montenteaume Hugon de Lucenai chevaliers et Guion de Monz escuier qui doivent tenir ostaiges à Ostum à la requeste dou devant dit Hugon et Estevenot et Marguerite ou de lor certain commandemant car j'ay juré sor seinz evangiles de rendre lou chastel et la chastelerie de Glane et les apertenances des la touz seinz en là totes les foiz qu'il me randroient les dites VIe livres an la dite valour laquelle chouse se je ne la façoie li devant dit chevaliers Guioz de Monz escuiers sont tenuz por lor sairemanz de tenir ostaiges à Ostum à la requeste au diz Hugon Estevenot et Marguerite ou de lor certein comandemant jusque je lor heusse randue la devant dite guaigere par les VIe livres devant nommées an la dite valour et je ne puis rien lever de Garrel de Glane por force facent s'il ne vuest por son gré ou por son forfait jugié an ma cort por jugemant Et por desus totes ces choses j'ai mis mon seignour de Brancion an ploige an la main es devanz diz Hugon Estevenet et Marguerite se je de ces choses de rien defailloie Ces lettres furent donées lou juesdi après l'octave de l'Annunciation Nostre Seignor an l'an de l'Incarnacion mil CC cinquante et trois ou mois d'avril