Charter Document - 02060090

Nos Jehans de Aligney chevaliers et dame Dannons fame au dit Jehanz faisons savoir à touz ceaus qui verront ces présentes lettres que nos por nostre prou et por nostre besoing contreignant de nostre espoigne gré sanz nulle force et sanz nul barat et sanz nulle déception avons mis en gaige à nostre redoutez pere Girars por la grace de Deu avesque d'Ostum nostre ville de Sove qui siet ou Vaul de Lucenay et quant que nos avons ou poons avoir en la devant dite ville en maisons en terres en prez en champs en bois en vignes en homes en tailles en censes en costumes en aigues en pastures en jostice et en totes autres choses quex qu'elles soient les quelles choses totes de sus dites nos tenons en fié et sunt et muevent dou fié de l'yglise et de l'avesque d'Ostum por IIe livres de Viennois des quex nos avons heu nostre greance et nostre finance dou dit avesque et nos en tenons à paié antirenemant et nos devestons de la dite ville et des choses de sus dites et an revestons lou dit avesque corporelmant et prometons por noz sairemanz que nos avons fait et baillié corporelmant sus seintes evangiles la devant dite gaigere tenir en pais garantir et deffendre contre tote genz ne ne venrons en contre ne por nos ne por autrui por parole ne por fait en jugement ne defors ne ne consentirons ne n'aiderons nullui qui vuille venir en contre ne por nos ne por autrui et quant à ces choses devant dites garentir et tenir en pais nos obligeons au dit avesque et à ses successors touz nos biens mobles et non mobles quanque nos avons ne poons avoir et nos hoirs et renoncons à totes demandes endui ensamble et chascuns por soi por noz sairemanz devant dit à totes deffenses à totes barres et à totes hainnes que nos ou nostre hoirs avons ou poons avoir sus ces choses et nos li devant dite Dannons par nostre sairemant abrenonceons à toz assenemanz et à tote hautoire et à tote hainne qui est escripte et continue en droit escrit et an costume por raison de privilege de doaire ou par favor ou por raison de fame et abrenonceons an dui ansamble à totes choses c'un porroit dire an contre ceste lettre ne ceste gaigere et especiaumant au droit qui dit que généraus abrenonciations ne vaut noiant an tel meniere que quant nos aurons au devant dit avesque ou à ses successors ou à lor comandemant fait lor gré ou lor finance des devant dites douz cenz livres ces choses revanront à nos et à noz hoirs sau lou fié de l'yglise et de l'avesque d'Ostum An tesmoignaige de ces choses devant dites nos li diz Jehanz por nos et por la devant dite dame Dannons nostre fame à la requeste de celi avons mis nostre seaul an ces presentes lettres et nos li devant dite Dannons avons prié et requis lou dit Jehanz nostre mariz que il mete son seaul por lui et por nos en ces lettres et il l'i a mis à nostre requeste et à nostre prière et nos avons prié et requis an dui ensamble et chascuns por soi à noble baron à Jehanz de Chastoillom seignour de Rosillom que il meist son seaul an ces présentes lettres an tesmoignaige de ces choses de sus dites et nos diz Jehanz de Chastoillom sire de Rosillom à la requeste et à la prière des devant diz Jehanz d'Aligny chevalier et de dame Dannon sa fame avons mis nostre seaul en ces présentes lettres an tesmoignaige de vérité Ce fut fait et doné an l'an de l'incarnacion nostre Seignour mil CC sexante et quatre ou mois d'oictouvre