Charter Document - 02060089

A toz ces qui vaurunt ces présentes lettres je Jahanz d'Aligney chevaliers fais à savor que cum je hausse obligié et mis an gaigiere an la main de redoté pere mon soignour Girart por la grace de Dei avaque de Ostun la vile de Souver les bois les prez et totes les apartinances les issues les rantes et les esploiz de la dite vile por deux cenz livres de Viennois les quex deux cenz livres je havoye receues dou dit avasque sus la dite vile de Souver et des apartinances la quele vile et les apartinances je tenoye et tien an fyé dou dit avaque et de s'iglise d'Ostun et je haye payé au dit avasque les dites deux cenz livres et fait son gré li dit avasques m'a randu la dite vile de Souver et le sapartinances et se tient à payez de moy et des dites deux cenz livres de Viennois et je me a tien a paiez de lui et de la dite gaigiere et de la tenue et de la randue An tesmoin de la quel chose por ceu que je n'ay seal je ha fait metre an ces présentes lettres les seaus des honorables homes Jahan priour de Bar mon soignour Guion arceprovoire de Corbigney et de maistre Gile arceprovoire de Sainte Marie dou Bois et nos priours et arceprovoire devant dit à la requeste et au comandemant dou devant di Jahan chevalier avous mis nos seaus an ces présentes lettres an tesmoin de verité Ceu fu doné à Lucenay an l'an de nostre Soignour mil deux cenz septante et trois le diemoinche après la feste saint Martin d'iver