Charter Document - 02060069

Nos Robertus dux Burgundie notum facimus universis presentes litteras inspecturis quod in nostra presentia propter hoc specialiter constituti nobilis mulier domina Poncia de Troicheriis Huetus et Jaquetus ejus liberi scientes prudentes et spontanei non vi non dolo ad hoc inducti neque in aliquo circumventi pro evidenti necessitate et utilitate manifesta ipsorum ut asserunt vendunt tradunt quittant et concedunt imperpetuum reverendo in Christo patri Hugoni Dei gratia episcopo Eduensi suisque successoribus episcopis Eduensibus precio sexcentarum et quinquaginta librarum monete Viennensis preposituram suam de Sedeloco Eduensis dyocesis et omnes res inferius annotatas videlicet domum suam de Sedeloco sitam juxta ecclesiam beati Andochii cum manso ipsius domus item duodecim secturas prati vel circa sitas subtus ecclesiam sancti Saturnini de Sedeloco item medietatem messarie parochie de Sedeloco item terciam partem justitie magne et parve Sedelocensis et totius castellanie ejusdem loci cum tercia parte amendarum item ventam cyphorum et aliorum lignorum in tribus nundinis Sedeloci item feodum de renda vinorum que venduntur apud Sedelocum cum juribus omnibus pertinenciis et appendiciis predictorum et omnia alia que habent et habere possunt aut debent in castellania ipsius ville ratione dicte prepositure vel alia qualicumque que movent ut asserunt de feodo dicti episcopi de vestientes se penitus de predictis omnibus coram nobis [] Hanc autem venditionem consensit dominus Guido de Montebarro miles promittens per juramentum suum contra ipsam non venire nec ipsam redimere seu ipsam per se vel per alium retractare In cujus rei testimonium ad supplicationem venditorum et Guidonis predictorum sigillum nostrum presentibus litteris duximus apponendum Datum anno Domini MCC octogesimo octavo mense novembri