Charter Document - 02060066

Nous Hugues dux de Borgoingne façons savoir à touz ceaus qui verront ces présentes lettres que Alixandres et Jehans qui furent filz mon seignour Arnou de Aligne cognoissent aus estre fors de toutes avoeries estaubli por ce an nostre présence ont recogneu aus avoir pris an perdurauble fié de Girart évesque d'Ostun lou mès de Jehan de Lestan et les apertenances de celui més et la moitié de l'estan de Cham Comaul la ville que l'on apele Outre Earone et les apertenances de celle ville sauz lou més qui fut damz Bernarz la ville que l'on apele lou Reu et les apertenances de celle ville la ville que l'on apele Principau et les apertenances de celle ville tout quant qu'il ont an la ville que l'on apele Cumienne la ville que l'on apele Jarnoy et les apandises sauz ce que li chapitre de Sauleu hai an la dite ville tout quant que il ont en Chaseingnes en bois et en toutes autres chouses c'est à savoir en la ville de Chaumiens sauz lou més Baillot qui est au seignour de Guipey et le finaige de celle ville la ville de Marnay sauz trois més qui sunt au chapistre de Saaleu et lou finaige de celle ville la ville de Reglais et les apertenances de celle ville tout quant que il ont à Goloiz et ès apertenances tout quant que il ont en Vaus de Chaissey en més en homes en bois en terres en autres chouses ensinc cum la valée porte dès Poloysie en jusques à Lucenay à destre et à senestre la moitié de l'estan desouz lou moistier d'Aligney que l'on apele lou grant estan et la moitié dou molin de celui estan la moitié de l'estan de Marnay et des molins dou dit estan la quarte partie des bois qui partent avec les anfanz d'Arne et avec Johannin de Aligney la moitié de la forest Chauve qui part avec Johannin d'Aligney la moitié de la forest de Rouge Terre la moitié dou bois d'Outre Ture qui part avec Jehannin de Aligney la moitié de la forest que l'on apelle Giros Vernoy la moitié de la forest que l'on apelle Jarmya la moitié de la forest que l'on apelle Tueberthain la moitié de la forest que l'on apelle de Chaselles souz maiour la moitié de la forest que l'on apelle de Forcenne qui part à Jehannin de Aligney la moitié de la forest de Chanlar en laquelle Guillaume de la Bouloye hai la quarte partie la moitié de la forest de Bron et touz les plaissiez et les sarrées ensinc cum elles vont entre Ruères et Pancères et Beaumont et lou vaul d'Aligney dès Bron jusques à l'estan de Bois Comau la moitié de Gros Bois la moitié de la forest de Pancères la moitié de Boloy de Vignol la quarte partie de la forest Garnier la moitié dou bois de Romenay la moitié de la sarrée d'Yllant la moitié de la sarrée de Boquerouse la moitié des bois qui partent ès homes de Seint Ligier la moitié de la sarrée de maison Ytier et lou fié que Jehannins d'Aligney doit tenir dou dit Alixandre et Jehans c'est à savoir la fort maison d'Aligney et lou fié que Guioz de Julley tient d'aux et lou fié que mes sires Guillaume de Turcey tient d'aux et generaulmant quanque il tiennent ou doivent tenir an la terre d'Aligney et ès apandises an terres an bois an homes an justices an rivieres an prez an autres chouses et an fiez et an rière fiez sauz la maison fort de Aligney que il tiennent dou conte de Neverz c'est à savoir la maison d'Amont et sauz lou fié de Poilemarrou lou quel il tient des anfanz d'Arne et sau lou fié dou Confergien et est à savoir que li diz Alixandre et Jehans et lor hoirs et tous ces qui tiennent ces devant dites chouses ou tiendront de l'évesque d'Ostun en fiez sanz nuns maiens an quelque ménière que ceste choses tiennent et queque les tiennent en telle ménière que elles ne veingnent en rières fiez Et toutes cez chouses il sunt tenu garantir il et lor hoir à l'évesque d'Ostun et en ont lié an la main l'évesque d'Ostun por lou sairemant fait devant nous aus lor choses lor hoirs et toutes les choses que il porront conquester ne avoir quelcunques elles fussent et de toutes choses garantir et tenir an pais au dit évesque il et lor hoirs tenu par lou devant dit sairemant et por ces choses faicent il ont heu dou dit évesque dix et sept vinz livres de digenois les quex il ont receu dou dit évesque en deniers nombrez ensinc cum il ont recogneu par devant nous et cez choses li évesques d'Ostun ne puet mettre an autre main En tesmoing des choses devant dites por la prière et por la requeste des devanz diz Alixandre et Jehan nous avons mis en cez présentes lettres nostre seaul Ce fut fait an l'an de Nostre Seignor MCC et LX ou moys d'oictouvre