Charter Document - 02060044

A touz ces qui verront cez presentes lettres nos Guillermes de Sauci humbles priours de Vaul Croissant faisons à savoir que Amie de Vouvre damoiselle fame çai en arriers Hugues dyen de Vouvre et Girarz filz çai en arriers Perrenet dit dyen de Sussey por ce especiaulmant estaubli en nostre présence on recogneu por devant nos que il tiennent de fié de Jaque de la Roiche por la grace de Deu évesque d'Ostun ces chouses de sus nommées por la raison de l'éveschié d'Ostum C'est à savoir la moitié dou champ de la Corte lou jornaul de la Come de l'estan lou quart de la Chaume Morin lou quart dou champ de maiserotes qui part ès Potiers la moitié dou champ d'Escholier les trois pars dou champ des Contorz les trois parz de la Faisse de sus les Contorz les trois parz dou champ de L'Aube Espin lou quart dou champ de Luffert de sus l'Aube Espin les trois parz dou champ de Luffort de sus la terre ès Bons Homes la moitié dou champ de sus les Places les trois parz de la Chaume d'Escoce la maison ès anfanz Renier lou champ dou Chasse la Faisse de sus la corvée au Sauvour lou quart des Faisses de Roiches qui partent ès Potiers et tornent sur le champ de la Croix sus la terre ès Fergeranz la moitié dou champ de sus l'Uis Boceaul l'assart de la Guaite qui part ès Cornoz la chaume dou santier de souz la voie de Latrée la coihée que l'an appele des Crusilles qui part ès bois dou chapistre d'Ostum et ès Bethelins et sient entre pré Rendot et le champ de Chardenieres la moitié de l'Anceingere et de la terre de sus la Cimeise dou Bouchaut la moitié de la chaume de Cremevoles le vivier et lou cortil dou Duyr et une soiture de pré qui part avec Regnaut Chochelin qui siet darrier Crusilles ou pré dou Chaigne qui siet desouz la Coihée dimie la soiture dou Pont dimie la soiture de la Virenoule qui partent ès Cornez dimi lou pré de Chaigne qui siet desus le pont demi le pré que l'an appele pré aux Bachelers la moitié dou pré Marceaul la moitié des hastes dou Turrot Guiart lou quart dou pré Boton les novandeins l'aste dou Maulpas les quex chouses de sus nommées li devant die Amie et Girarz tiennent en samble sanz devision De rechief tient dou dit fié la dite Amie sanz partie dou dit Girart la moitié dou champ de la Jonchère li assart de la venue lou Chasaignot de souz Chaumont demi jornaul ou champ de la Monoise le champ dou pré Bouton le cham de sus la Concise Berthaul Chevrier la venue desus les Cortix de Serecourt li assart desus la vie de la Crose lou quart dou champ de la Couhete la moitié dou champ de Crousot desoz lou cortil de la Vaul desoz le Maygni qui soloit estre Moart l'aste dou cortil desoz la maison Tureaul lou quart dou champ de la Vaul les trois parz dou champ de Lambue lou champ de Murgerot les trois parz dou champ de Loiseraule le champ qui siet de costé Crusilles et part es Cornez le quart de l'essart Bernart au Roux qui siet desus le pré de la Vichieres et dure dusques au bois de Bruil les trois parz dou champ dou Cranhaulot lou champ de sus la vie dou Cranhaulot lou champ dou poirier de Chaumont fors un journaul le champ de Chaumont des lou crot en sus la veinue qui torne sus lou champ dou poirier de Chaumont et la maison de pierre qui sied à Vouvre et les apandises de la dite maison et lou bois que l'on appele lou Suyloy qui part es Poparz d'une part et l'essart au devant dit Girart d'autre lou bois qui siet de sus Vouvre qui part à la Sarrée mon seignour Houde de Rossillom d'une part et la vie Borbouse d'autre et les appendise dou dit bois la moitié de l'estan et dou molin et des appendises et les prez et les terres qui sunt environ de l'estan c'est à savoir dès la terre au Buens jusques au bois de Bruil d'une part et les terres ès anfanz Guiote et les terres de Tremenelles d'autre part sanz devision De rechief tient le dit Girart dou dit fié sanz partie de la dite Amie lou champ des Vies lou jornaul de sus lou Périer dou Crousot lou champ de la Vaul la moitié dou champ de maiserotes la chaume de Praelles les trois parz dou pré de Praelles les trois parz dou champ de la Varenne lou champ de la Quarre l'uychote Gazeaul lou champ de Maul Pas lou champ de Chardenieres lou cortil de la Fonteinne lou cortil des Périers lou cortil de sus la vie dou Colomier et les essarz de la vie Borbouse jusques à l'aissart ès anfanz Perrenot Pute Giere et jusques à la vie de Sulley et li essart de Sulley qui part au bois dou Vaul et ont promis li devant dite Amie et Girarz en bone foy por devant nos que se il ont riens oublié à metre et à nommer en cest escrist de chouse que il tiennent dou dit fié que il lou feront savoir au dit Jaque au plus tost que il porront Ou tesmoing de la quel chose nos li devant dit Guillerme à la requeste de devanz diz Amie et Girarz avons mis nostre seaul en ces présentes lettres faites et donées en l'an de grace mil CCLXXX et cinc ou mois de marz