Charter Document - 02060040

Ge Girarz chevaliers prevoz de Thoysi l'Avesque et ge Mahauz fame dou dit chevalier façons savoir à touz que cumme nostres redoutez pères en Jhesu Crist Girarz par la grace de Deu evesque d'Ostum nos hait soffert par sa cortoisie et par sa grace à faire i four en nostre maison de Thoysi à maintenir tant cum li plaira et à ses successors por cuire soulemant le pain de nostre hostel nos ne poons ne devons cuire au dit four fors le pain es homes de Thoysi ne de autre leu ne le pain à noz maignies cui nos devrons lor panaige Ces covenances et cez chouses de sus dites nous devant dit G et Mahaut prometons par noz sairemanz donné corporelmant sus la seinte evangile à garder et à tenir tant cum l'on nos soffrera le dit four et por ce que nos n'avons point de seaul nos avons fait à metre le seaul de la cour de honorauble baron G[ui] de Gissi arcediacre de Avalo en cestes presentes letres Ce fut fait l'an mil CCLXXVI ou moys de septembre