Charter Document - 02060030

A toz ceus qui varrunt et orrunt ces presentes lettres je Jaques Arragons de Mont Moret sire de Crili chevaliers fais à savor que je tien tout ceu que je ha à Brin an jutise et an soignerie et an totes autres choses qui meuvent de l'éretaige des soigneurs de la Roiche dou Vanneal dou fié mon soigneur l'avasque d'Ostun nu à nu et maumemant quinze levrées de tearre les queles Jahans mes fis ha achatées de Guillaume de la Roiche dou Vanneal fil jadis Gautier de la Roiche assises à Brin et es appartenances et quant il diz Jahans sera an ayge parfait il sera tenuz de venir an l'omenaige audit mon soigneur l'avasque et panre les dites quinze levrées de tearre dou dit mon soigneur l'avasque d'Ostun nu à nu et li diz avasques d'Ostun l'an doit recevor Ou tesmoin de la quel chose je ha requis l'official l'arcediacre de Flavigni qu'il mete le seal de la cort audit arcediacre an ces présentes lettres et mon soigneur Jahan soigneur de Frolois qu'il y mete autresint le sien seal Et nos li devant dit officiaus et Jahanz avons mis les diz seaus an ces présentes lettres à la requeste dou dit Jaque Arragon Ce fut fait an l'an Nostre Soigneur mil deux cenz sexante et dis et huit ou mois de fuvrier