Charter Document - 02060014

Nos Guillaumes Patruz doyens de Saeluy maistres Pierres Bretenaz archeprestes d'Ostun maistres Jahanz archeprestes de Flavigne Berthelomiers prestes et curéz de Alise maistre Estiennes curéz de Quarrées Symons chanoines de Belle Vile et maistres Giles curéz de Ozoles facons savoir à touz çaus qui verront cestes présantes lettres que cum religious hom Guillaumes abbés de Flavigne eust requis à Alise le jor dou vandredi de la voille saint Jahan Bauptiste an l'an de notre soignour mil deux cenz et septante et trois à redoté père en Jhésu Crist Girart par la grace de Deu avesque d'Ostun les clers de Flavigne disant au dit avesque an tel menière Sire votre hom suis et vos estes mes sires vertéz est que je vos hai randues à vostre requeste les clers de Flavigne des tours des forteresces et des portes et an hai fait vers vos mon devoir et ferai toz jors Celes clers vos avez bailliés au duc de Borguoigne nos vos prions et requérons que vos an facoiz tant vers nos que vos n'an ayez pechié et que vos les nos randoiz Li devant diz avesques dist au dit abbé en tel menière Sire abbés nos irons ou anvoierons voluntiers au dit duc et ces clers nos li requerrons que les nos rande et se il les nos rant nos an ferons vers vos nostre devoir et se il avenoit que ja ne soit que li diz dux ne nos voussit randre les dites clers saichiez que nos porchaceriens par le roi de France et en toutes autres ménières que nos porriens que il les nos randist et n'an serons ne au demoré ne an négligence ne an colpe dou requérir ne dou porchacier vers le roi Et comme ces clers soient toz jours randues à l'avesques d'Ostun de l'abbé de Flavigne toutes les foiz qu'eles hont esté randues et toutes les foiz qu'eles sunt randues à l'abbé que l'avesques d'Ostun li rende nos vos requérons et comandons et deffandons comme à nostre homme et par la féauté et par le sairement que vos avez à nos que an randant lesdites clers ne an recevant vos n'an muez néant de çou qui ha esté fait cay an arriers et espécialmant que vos ne les recevoiz d'autre main que de la nostre et çou nos vos deffandons de par le roi de cui nos tenons lou régale et que vos contre ces choses devant dites ne facois riens ou domaige et ou préjudice de nos et de nostre iglise d'Ostun et nos an apelons à mon soignour le roi de France de cui régale ces choses muevent et métons nos et ces dites choses an la protection dou dit roi et an apelons à guaranz ces bones janz qui ci sunt Ou tesmoin de les quex choses nos doyens Pierres Jahanz Berthelemiers Estiennes Symons et Giles qui fumes à ce présant et ansamble Jahan vicaire de Alise maistre Jobert Guillaume de Saint Symphorien clars Jahan Curet Odet d'Alise et pluisours autres à çou apeléz et présanz avons mis nostres seaus an ces présantes lettres à la requeste dou dit avesques Ce fu fait et doné an l'an ou jour et ou lui dessus diz