Charter Document - 02060010
| Charter Number: | 02060010 |
|---|---|
| Cartulary Title: | Cartulaire de l'Evêché d'Autun |
| Charter Language: | Latin |
| Charter Origin: | Royal |
| Charter Type(s): | Decree |
| Date: | 1190 |
| Date type: | Internal |
| Resource Link(s): |
Archives départementales de Saône-et-Loire - G 443 (p16) |
Charter:
Aalis Dei gratia Francorum regina et Willermus eadem gratia Remorum archiepiscopus sancte Romane ecclesie tituli sancte Sabine cardinalis apostolice Sedis legatus omnibus ad quos littere iste pervenerint in Domino salutem Noverit universalitas vestra quod litigantibus invicem coram nobis dum vices regias gereremus Galtero Eduensi episcopo et Rainaldo abbate Flaviniaci de forma pacis que inter eos Lugduni auctoritate domini Regis ibidem presentis debuerat provenisse cum idem episcopus assereret Flaviniacum cum omnibus pertinentiis suis de feodo suo esse et inde sibi abbatem Flaviniaci hominium et fidelitatem fecisse prestito in sacrata manu episcopi juramento quod idem abbas non recognoscebat tandem inspecto tenore regalis privilegii quod episcopus coram nobis Parisius protulit juxta ejus continentiam jamdicto episcopo idem feodum cum pertinentiis suis adjudicavimus et abbatem ab episcopo ipsam villam Flaviniaci cum integritate feodi recipere fecimus Quia vero hominium factum et fidelitatem prestitam abbas diffitebatur a testibus scilicet Matisconensi et Cabilonensi episcopis et Cluniacensi et sancti Petri Cabilonensis abbatibus ex utraque parte evocatis rei veritatem duximus inquirendam qua nobis per eosdem die quam prefiximus Senonis patefacta hominium ab abbate jamdicto episcopo fuisse factum et fidelitatem prestitam mediante sicut dictum est sacramento cognovimus et ipse abbas publice recognovit et quod ita pro feodo illo teneretur episcopo sicut episcopus regi Promisit etiam quod in capitulo Eduensi eamdem recognitionem die ab episcopo sibi assignata iterato sollempniter publicaret Actum Senonis anno incarnati Verbi MC nonagesimo