Charter Document - 02050085

In nomine sancte et individue Trinitatis Patris et Filii et Spiritus Sancti amen Anno incarnationis dominice MCC octogesimo sexto die lune in crastino festi beati Michaelis archangeli nos Jacobus Dei gratia episcopus Eduensis infirmi corpore tamen in bona et sana memoria constituti timentes ne nos decedamus intestati cum nichil sit certius morte nichil incertius hora mortis ignorantes etiam quid nobis sit dies crastina paritura de bonis et rebus nostris disponimus et ordinamus in hunc modum nostrum de hiis facientes et ordinentes testamentum seu nostram ultimam voluntatem In primis in ecclesia nostra Beati Lazari Eduensis nostram eligimus sepulturam et in ea volumus et precipimus sepeliri Item debita nostra solvi volumus de bonis nostris per executores nostros a nobis inferius nominandos si tantum de bonis nostris ad manus pervenerit eorumdem Item clamores nostros si qui post mortem nostram inveniantur per executores nostros pacifficari volumus et solvi de bonis nostris Item volumus et precipimus quod familie nostre et illis qui nobis servierint et serviebant tempore mortis nostre detur per executores nostros in pecunia aut rebus aliis de bonis nostris juxta servicium ab eis nobis impensum quod executorum nostrorum relinquimus arbitrio faciendum Item cum vir illustris dominus Robertus dux Burgundie illam nobis gratiam fecerit specialem quod viginti libratas terre annui redditus de reditibus proventibus et exitibus quos habemus in villa de Moncellis qui sunt de feodo dicti ducis possumus amortuare ac de dictis viginti libratis terre nostram plenius facere voluntatem nos ecclesie nostre beati Lazari Eduensis predicte damus legamus decem libras Parisiensium annui redditus pro luminari faciendo in ecclesia supradicta quas decem libras annui redditus assedemus et assignamus super redditus proventus et exitus nostros ville predicte Item quadraginta solidos Turonensium annui redditus damus et legamus ecclesie Beate Marie Belnensis pro anniversario Huonis fratris nostri quondam prepositi ecclesie nostre Eduensis in eadem ecclesia Belnensi annis singulis faciendo quos similiter assidemus et assignamus super redditus proventus et exitus nostros predicte ville Residuum autem viginti libratarum terre predictarum annui redditus quod superius non legavimus damus et legamus ecclesie nostre Eduensi pro anniversario nostro in eadem ecclesia annis singulis faciendo Item volumus et precipimus quod omnia bona nostra mobilia quecumque sint et ubicumque per executores nostros inferius nominandos aut eorum aliquos vendentur et distribuantur pro premissis faciendis et implendis Hujus autem nostre ultime voluntatis executores nostros facimus ordinamus et constitimus prenominatum Robertum ducem Burgundie dominum Guillelmum de Rocha Nolayi militem fratrem nostrum dominum Hugonem de Faucoigneyo cantorem ecclesie nostre Eduensis magistrum Haymonem de Pesmis archidiaconum nostrum ecclesie predicte magistrum Johannem de Borbonio archidiaconum nostrum Avalonensem in ecclesia nostra predicta magistrum Petrum archipresbiterum nostrum Eduensem et dominum Gerardum dictum Passeriet rectorem ecclesie de Sancto Gervasio nostre diocesis volentes et ordinentes quod si omnes nollent aut non possent exequi hanc nostram ultimam voluntatem quod quinque aut quatuor aut tres aut duo aut unus eam exequentur Volumus etiam et ordinamus quod post mortem nostram auctoritate propria apprehendant bona nostra omnia mobilia et de hiis exequantur hanc nostram ultimam voluntatem dantes executoribus predictis et eorum cuilibet generalem et plenam et liberam potestatem ita quod non sit melior occupantis omnia et singula premissa faciendi de dictis bonis nostris predictis que nos facerimus aut facere possemus si essemus in humanis deffendendique hanc nostram ultimam voluntatem contra omnes et singulos et eam declarandi et increpandi Hanc autem nostram ultimam voluntatem solam et unicam volumus valere jure testamenti aut jure codicillorum aut jure cujuslibet alterius ultime voluntatis et si non valet secundum leges valeat secundum canonicas sanctiones In quorum omnium testimonium robur et auctoritatem presenti testamento nostro seu ultime voluntati sigillum nostrum fecimus apponi rogantes carissimos nostros in Christo magistrum Haymonem de Pesmis archidiaconum nostrum Eduensem predictum Henricum de Gleris canonicum nostrum Eduensem nepotem nostrum dominum Gerardum dictum Passeriet predictum magistrum Radulphum Anglicum presbiterum dominum Regnauldum de Costa et dominum Henricum capellanos nostros magistrum Stephanum archipresbiterum de Quarrees ut ipsi una cum sigillo nostro sua apponant sigilla Et nos omnes prenominati ad rogatum dicti domini episcopi sigilla nostra presentibus apposuimus ad majorem roboris firmitatem Actum anno et die quibus supra