Charter Document - 02050018
| Charter Number: | 02050018 |
|---|---|
| Cartulary Title: | Cartulaire de l'Eglise d'Autun |
| Charter Language: | Latin |
| Charter Origin: | Religious |
| Charter Type(s): | Judgement |
| Date: | 1231 |
| Date type: | Internal, A.D., Feast |
| Resource Link(s): |
|
Charter:
Nos Guido Dei gratia Eduensis episcopus et Johannes de Parisius presbiter canonicus et abbas Sancti Stephani Eduensis notum facimus presentibus et futuris quod viri venerabiles Ansellus decanus et capitulum Eduenses communi assensu compromiserunt in nos de controversia illa que longo tempore duraverat inter prepositum et cantorem super quibusdam preeminentiis in ecclesia nostra ratum et firmum habituri quicquid super hoc per nos fuerit ordinatum Res igitur habito consilio quanquam plenitudo adjectione non indiget nichil aliud super hoc volumus constituere quam id quod constitutum est per venerabilem patrem et bone memorie Galterum Eduensem episcopum cujus carta pre manibus capituli habetur sigillis ipsius episcopi et capituli munita que siquidem negotium illud ad plenum et sufficienter determinat Verum quum carta illa forte per negligentiam usque modo non est in usu habita precipimus quod publice legatur quociens contigerit aliquem de novo instituere canonicum et similiter quociens prepositus novus instituetur Nichilominus eciam firmiter precipimus quod dicta carta plenarium vigorem habeat in perpetuum et ab omnibus inviolabiliter observetur inhibentes sub pena excommunicationis ne aliquis contra hoc de cetero venire presumat Preterea notum facimus quod viri venerabiles Hugo de Marrigniaco prepositus et Gauterius cantor Eduensis super hoc articulo personaliter in nos compromiserunt donantes in manibus nostris fidem et plegios quod nostro super hoc starent arbitrio unde supradictis hoc addere decrevimus pro bono pacis quod vir venerabilis Hugo de Marrigniaco nunc temporis Eduensis ecclesie prepositus quamdiu preposituram tenebit preeminentiam habeat eciam in processionibus postea vero ista preeminentia ad cantoriam redibit sicut in predicta carta plenius continetur et ex tunc cantor omnes preeminentias de quibus litigabatur inter ipsum et prepositum pacifice cum suis successoribus possidebit Ad majorem hujus rei noticiam presentes litteras sigillorum nostrorum munimine fecimus roborari Actum apud Eduam anno gracie MCCXXX primo in vigilia Revelationis beati Lazari