Charter Document - 02050007
| Charter Number: | 02050007 |
|---|---|
| Cartulary Title: | Cartulaire de l'Eglise d'Autun |
| Charter Language: | Latin |
| Charter Origin: | Lay |
| Charter Type(s): | Confirmation |
| Date: | 1194 |
| Date type: | Internal, A.D. |
| Resource Link(s): |
|
Charter:
Ego Odo dux Burgundie notum facio presentibus et futuris quod ego et predecessores mei cursum monete Eduensis ecclesie cujus nummi hyilenses vocantur diu impedivimus Tandem vero Roberto ejusdem ecclesie decano et capitulo mihi supplicantibus ut ab hac injuria deinceps intuitu Dei et respectu matris mee Eduensis ecclesie cessarem habita diligenti inquisitione cum consilio meo prefatam monetam ad ipsam Eduensem ecclesiam pleno jure pertinere cognovi Unde volens tam anime mee in posterum cavere quam anime patris mei et aliorum qui causam hujus injurie dederant subvenire concessi et bona fide Eduensi ecclesie promisi prefatam monetam de cetero fovere et cursum suum per totam villam et in foro et in nundinis Eduensibus liberum habere Concessi etiam et promisi eisdem canonicis et eorum successoribus quod quotiens postulaverint a me vel a vigerio meo Eduensi vel a famulis suis eo absente cursus prefate monete in foro et in nundinis Eduensibus per preconem meum indicetur et publicabitur ne ab aliquo refutetur In refutatorem vero hujus monete penam de LXV solidis quam vulgus legem nominat statui ita quod nullata tenus remittetur sed infra septem dies a famulis meis levabitur cujus pecunie medietatem ecclesie Eduensi ob redemptionem anime mee donavi et concessi Statui etiam et firmiter precepi ut quicumque fuerit vigerius Eduensis istas pactiones bona fide jurabit tenere et medietatem prenominate pecunie ecclesie vel mandato suo reddere Monetarios equidem et omnes qui causa hujus monete venerint Edue in eundo et redeundo pro posse meo conduco Si vero quod absit ab istis pactis sicut in presenti carta continetur resilirent precepi et concessi ut tota terra mea interdicto supponatur donec ecclesie satisfactum fuerit Ut autem hoc totum firmum et inconcussum in posterum habeatur presentem cartam sigillo meo communivi Hujus rei testes sunt magister Hugo medicus ducis Nicholaus notarius ejus Bartholomeus de Rebello Huo de Edua marescalcus ducis milites Regnaldus vigerius Eduensis Teobaldus forestarius Girardus de Rebello Galterus forestarius Actum Edue anno Verbi incarnati millesimo centesimo nonagesimo quarto