Charter Document - 02050005

Quoniam primi parentis culpa exigente vita hominis ineluctabili cursu ad occasum tendens per temporum etatumque varietatem in dies permutatur ac cujuslibet cause irruentis in occursu vel morte interveniente humana deficiente memoria que causa pacis et concordie inter se faciunt concorditer homines placita et conventiones in oblivionem facile pertrahuntur aut hostilitatis et discordie imperio servire volentium pravorum hominum falsidia perversitate sepius depravantur que memoriter retinenda ulla oblivione deperire aut pravitate immutari nullatenus voluit litterarum monimentis annotari provida antiquorum solertia sapienter approbavit et qui imprimantur formam ostendendo ne oblivione deleatur quod in memoria habere voluerint posteris suis per futurorum exemplum provide prerogavit Horum igitur sequendo vestigia ego Wichardus de Bonant cognomine Canazola quam cum Narduino canonico sancti Nazarii de Bennito cliente suo quem pro Dei amore ab infantia nutrierat conventionem habui scripto et hujus carte testimonio presentibus et futuris volo lucide fieri hunc prefatum Bonitum quem ab Hugone Blanco in casamentum habebam et columniabar cum suis rebus omnibus mea et meorum heredum omni deinceps remota columnia omni tempore vite tue tibi Narduine habendum dono trado et penitus dimitto post mortem autem tuam sancto Nazario supra nominatum hominem et sua omnia et heredes qui ex eo exierint tam masculos quam feminas in perpetuum dono Hujus doni laudatores fuerunt Hugo Blancus uxor mea filii et filie Hujus igitur donationis ut rata sit confirmatio presentium testium apparet subscriptio ex parte mea testes affuerunt Hugo de Rocha Robertus Rufus milites Gillebertus capellanus Durandus presbiter de Reniaco ex parte Narduini Stephanus Eduensis episcopus Humbaldus archidiaconus Tebbaldus capellanus Gaufridus diaconus Sevinus presbiter de Reniaco Dodo camerarius Rodulfus camerarius