Charter Document - 02040104

Nos Ansellus Dei gratia Eduensis episcopus et Guido prime Lugdunensis ecclesie archidiaconus universis presentibus et futuris notum facimus quod cum discordia verteretur inter venerabiles viros decanum et capitulum Eduense ex una parte et nobilem virum Iohannem dominum Castellionis an Bazois et Roche de Mila ex altera super hoc quod idem Iohannes fregerat claustrum Eduense capiendo et extrahendo de dicto claustro per violentiam et cum armis Guidonem de Perreria domicellum et quosdam alios nobiles socios ejusdem Guidonis cum armis et equitaturis eorum tandem per nos et de consilio bonorum virorum de dicta fractione et emenda super hoc facienda inter partes in hunc modum extitit concordatum videlicet quod dictus Iohannes pro emenda dicti claustri accepit in feudum et casamentum a prefatis decano et capitulo viginti libratas terre sitas inter castrum de Rocha et villam de Montequot et super hoc idem Iohannes fecit homagium de suis manibus et fidelitatem decano ecclesie memorate quas viginti libratas terre idem Iohannes et successores ejus qui pro tempore fuerunt domini Roche a supradictis decano et capitulo tenebunt in perpetuum feudum et casamentum et decanis Eduensibus qui pro tempore fuerunt homagium facient nomine capituli Eduensis de dictis viginti libratis terre sicut idem Iohannes fecit decano superius nominato et dictas viginti libratas terre quicumque fuerit dominus Roche in perpetuum tenebit nec a dicto castro et dominio ipsius castri poterunt separari Item tenetur dictus Iohannes pro emenda fractionis dicti claustri ire nudus in camisia et bracis cum quinque de complicibus suis nobilibus qui cum eo interfuerunt fractioni dicti claustri ad unam processionem in prima Lugdunensi ecclesia et in aliis ecclesiis cum omnibus complicibus suis qui interfuerunt fractioni dicti claustri videlicet in Eduensi Lingonensi Matisconensi Cabilonensi et etiam Nivernensi in diebus sollempnibus cum a dictis decano et capitulo Eduensi super hoc fuerit requisitus si tamen ad dictas ecclesias possit ire secure et si forte non possit ire secure ad unam dictarum ecclesiarum iret ad alteram loco ipsius ad requisitionem dictorum decani et capituli Item tenetur restituere dicto claustro prefatum Guidonem de Perreria et socios ejus qui cum ipso capti fuerunt in dicto claustro cum armis et equitaturis eorumdem secundum posse suum et si quosdam de ipsis habere non posset tenetur totidem nobiles equalis vel majoris dignitatis et nobilitatis et totidem armaturas et equitaturas equalis vel majoris valoris loco ipsorum restituere dicto claustro Et si dictus Guido vel socii vel aliqui nomine eorumdem occasione dicte captionis inquietarent prefatos decanum et capitulum per placitum vel per guerram idem Iohannes tenetur dictos decanum et capitulum juvare et a dicta inquietatione secundum posse suum liberare per placitum vel per guerram cum propriis sumptibus ipsius Iohannis prout a prefatis decano et capitulo fuerit requisitus Item tenetur idem Iohannes pro dicta emenda se et omnes illos qui interfuerunt fractioni dicti claustri reddere in prisionem dictorum decani et capituli infra claustrum Eduense et tamdiu ibidem morari quoad usque a dicto decano vel archidiacono Eduensi fuerint licenciati Et hec omnia predicta et singula idem Iohannes in nostra presentia tactis sacrosanctis evangeliis propria manu firmavit se firmiter facere adimplere et inviolabiliter observare In cujus rei testimonium ad preces et instantiam omnium predictorum presentibus litteris sigilla nostra duximus apponenda Actum anno gratie MCC quinquagesimo tertio mense Iunio