Charter Document - 02040092
| Charter Number: | 02040092 |
|---|---|
| Cartulary Title: | Cartulaire de l'Eglise d'Autun |
| Charter Language: | Latin |
| Charter Origin: | Religious |
| Charter Type(s): | Agreement |
| Date: | 1247 |
| Date type: | Internal, A.D. |
| Resource Link(s): |
|
Charter:
Nos Officialis curie Eduensis notum facimus universis presentes litteras inspecturis quod cum discordia verteretur inter capitulum Eduense ex una parte et Godefridum priorem sancti Raconis Eduensis ex altera super hoc quod dictus prior petebat augmentationem cujusdam beneficii sive prebende quam ipse percipiebat in ecclesia Eduensi ratione sui prioratus predicti propter quod etiam venerabilis pater Willemus abbas Cluniacensis et prior de Caritate fecerat dictum capitulum citari auctoritate apostolica apud Lugdunum tamdem pro bono pacis super dicta querela et controversia inter dictum priorem et capitulum Eduense amicabiliter compositum et pacificatum extitit in hunc modum videlicet quod exceptis et remissis sex solidis Divion quos dictus prior percipiebat in ecclesia Eduensi videlicet in Natali Domini duos in Pascha duos et in festo beati Nazarii duos dictus prior percipiet annuatim ultra prebendam seu beneficium quod consuetus fuerat percipere in ecclesia Eduensi in distributionibus cotidianis quantum percipit vel capiet ibidem vicarius ecclesie Eduensis hoc excepto quod licet vicarius nichil percipiat de anniversariis beneficiis sive sepulturis mortuorum nisi fuerit presens verumptamen dictus prior percipiet sicut hactenus percipere consuevit sive presens fuerit sive absens Consueverat siquidem percipere et habere idem prior in dicta ecclesia unum modium vini et dimidium frumenti ad mensuram refectorii quindecim solidos ad festum omnium Sanctorum pro vino triginta solidos ad festum beati Martini hyemalis et triginta ad festum beati Martini estivalis et quadraginta solidos pro septimana sua in festo beati Lazari mense Septembri sciendum siquidem quod nec prior sancti Raconis qui pro tempore fuerit neque monasterium de Caritate vel alius quisque poterunt capitulum Eduense inquietare vel aliquid reclamare de fructibus prebende sancti Raconis neque de aliis reditibus et proventibus ecclesie Eduensis Prior vero plenarie recipiet et habebit ea que sunt superius nominata que si eidem non redderentur ipse monitione premissa poterit sine pena denegare capitulo officium septimanarum suarum donec eidem reddantur Hanc siquidem compositionem et pacem dictus prior sancti Raconis promisit prestito juramento in perpetuum ratam et gratam habere nec per se nec per alium contra venire Idem vero capitulum eamdem compromissionem promisit bona fide in perpetuum observare In cujus rei testimonium ad petitionem capituli Eduensis et prioris supradicti presentibus litteris sigillum curie Eduensis apposuimus Actum anno gratie MCC quadragesimo septimo mense Aprili