Charter Document - 02040075
| Charter Number: | 02040075 |
|---|---|
| Cartulary Title: | Cartulaire de l'Eglise d'Autun |
| Charter Language: | Latin |
| Charter Origin: | Religious |
| Charter Type(s): | Restitution |
| Date: | 1238 |
| Date type: | Internal, A.D. |
| Resource Link(s): |
|
Charter:
Nos Ansellus decanus et obedientiarius ecclesie sancti Nazarii Eduensis et ego Cristianus officialis curie Eduensis notum facimus universis presentem cartulam inspecturis quod Bernardus matricularius ecclesie de Montelum crucesignatus homo sancti Nazarii Eduensis ad cor conversus confitens et recognoscens dictam matriculariam quam in eadem ecclesia jure hereditario se habere dicebat in periculum anime sue detineret cum sanctuarium Dei jure hereditario possideri non possit dictam matriculariam et quicquid in dicta ecclesia de Montelum et in decima et a parochianis ejusdem ecclesie ratione dicte matricularie percipiebat Deo et ecclesie beati Nazarii Eduensis a qua dicta ecclesia de Montelum movere dignoscitur liber et spontanea voluntate dedit quitavit in perpetuum et concessit cupiens animam suam super hoc liberare Quam siquidem quitationem et concessionem Hymbertus filius domine Sarre de Edua curatus dicte ecclesie de Montelum et Petronilla uxor dicti matricularii laudaverunt pariter et concesserunt Capitulum siquidem Eduense considerans sanam et laudabilem intentionem dicti matricularii in concessione et quitatione predicta attendens etiam quod dictus matricularius pretextu paupertatis votum crucis adimplere non posset eidem matriculario pietatis et renuntiationis intuitu decem libras Divionensium ut votum suum melius et facilius valeat adimplere dedit tradidit et persolvit Sciendum etiam quod dicti matricularius et uxor ejus juramento prestito promiserunt se dictam concessionem et quitationem in perpetuum ratam et firmam habere et contra omnes fideliter et efficaciter guarantire In cujus rei testimonium ad preces et instantiam omnium predictorum ego decanus sigillum meum proprium et ego officialis sigillum curie Eduensis presenti cartule apposuimus Actum anno gratie MCCXXXVIII mense Aprili