Charter Document - 02040063

Anno Domini millesimo ducentesimo trigesimo in capitulo generali quod celebratur in crastino nativitatis beati Iohannis Baptiste nos Anselinus decanus et capitulum Eduense de assensu communi constituimus quod si aliquis canonicus suo concanonico de fructu prebende sue injuriam fecerit et propter hoc ad querimoniam injuriati dies a capitulo fuerit assignata prima die sine delatione injuriator ad objecta conquerenti respondebit Item constituimus quod nullus canonicus homines ecclesie in causam trahat coram alio judice quandiu poterit jus suum consequi quam coram terrariis de quorum balliva homines illi fuerint vel etiam coram capitulo Item constituimus quod camerarius bis in anno computet videlicet die veneris post Dominicam qua cantatur Ad te levavi et die veneris ante Nativitatem sancti Iohannis Baptiste et canonici tantum qui tunc presentes erunt ad compotum qui scilicet possunt et debent interesse percipiet unusquisque tres solidos ita tamen quod illi qui ante compotum a civitate recesserunt et illi qui post compotum advenerunt similiter habebunt quisque tres solidos Item innovamus ne canonicus eat ad parvum conventum nisi propter septimanam faciendam quoniam ibi non faceret residentiam nec haberet distributionem si vero canonicus infirmatur quandiu morabitur in domo sua percipiet integre distributionem et postquam exierit domum suam ibit ad quam voluerit de duabus ecclesiis et si non poterit propter infirmitatem sustinere laborem chori sedeat in ecclesia ubi sibi placuerit quandiu hora distributionis celebrabitur et habebit distributionem sicuti alii canonici sin autem nihil habebit Item innovamus quod ille qui de cetero capiet baculum anni novi nihil penitus habebit de bursa capituli Si quis autem contra hec venire presumpserit donec resipiscat ab omnibus evitabitur et ad nullos actus canoniales recipietur Iste constitutiones sive innovationes teneantur et vigorem habeant donec capitulum de communi assensu in capitulo generali sancti Iohannis Baptiste aliter voluerit ordinare et ad hoc confirmandum et testificandum presenti scripto sigillum nostrum fecimus apponi