Charter Document - 02040057

G divina miseratione Eduensis ecclesie minister humilis omnibus ad quos presentes littere pervenerint salutem in Domino Noveritis quod cum Iohannes de Marregney prepositus Beliniaci per inquisitionem legitimam factam a decano Eduensi condempnatus esset et tenetur ad restituendum capitulo Eduensi usque ad quadrigentas libras Divion in quibus idem Iohannes dicebatur gravasse et dampnificasse capitulum occasione dominationis et potestatis quam exercuerat in potestate Beligniaci tam ratione prepositure sue quam ratione prebende quam percipiebat ibidem demum idem Iohannes pro bono pacis et ad consequendam gratiam et bonam voluntatem capituli plene retento et reservato jure spirituali canonie et dignitatis prepositure cessit capitulo usque ab instanti Nativitate beati Iohannis Baptiste in viginti quinque annos omnem dominationem et potestatem quam ut canonicus ac etiam ut prepositus exercere posset temporaliter vel deberet in potestate Beligniaci et alias ubicumque in terris ecclesie Eduensis ac totum temporale emolumentum quod inde provenire deberet hoc solo retento quod cum idem Iohannes jamdiu contendit ad annovendum Ramundum militem prorsus a potestate Beligniaci adhuc ad id laborabit bona fide Et si quid emolumenti per pacem vel per judicium fuerit consecutus totum remanebit canonicis percipientibus prebendas suas in potestate Beligniaci et ipsorum valentiam annuam illius emolumenti secundum quod eam estimaverit dominus Iohannes de Paris eidem Iohanni singulis annis solvere tenebuntur ac post decessum ejusdem Iohannis prout ipse ordinaverit idem redditus die anniversarii sui distribuentur in perpetuum in ecclesia Eduensi et si etiam casamentum aliquod a prepositura dependens fuerit distrahendum poterit idem Iohannes sibi emere si illud pro eodem precio capitulum noluerit retinere si vero capitulum sibi retinuerit elapsis viginti quinque annis predictis prepositus qui pro tempore fuerit poterit illud pro eodem precio rehabere Ad hec capitulum ipsum in compensationem congruam premissorum concessit et promisit quod usque ad viginti quinque annos predictos annis singulis quibus idem Iohannes extiterit canonicus et prepositus reddet ei pro proventibus quos possit percipere de prepositura quinquaginta libras Divion pro fructibus vero prebende quadraginta si fecerit residentiam juxta consuetudines ecclesie Eduensis ita quod si recepisset quadraginta libras predictas nec fecisset residentiam eas integre capitulo restituere teneretur alioquin de ipso fieret quod de aliis canonicis non residentibus capitulo prebendas perceptas absque legitima residentia fieri consuevit reddetur aut totalis hujus pecunie una medietas in festo B Lazari reliqua vero infra octabas Pasche sequentis preter hec etiam supradictus Iohannes eo modo quo alii canonici percipiet minutas participationes in ecclesia Eduensi Preter hec etiam quitavit ei capitulum dampna tam supradicta quam alia que ipso capitulo irrogavit ubicumque Universa autem capitula superius comprehensa promisit sepefatus Iohannes interposito juramento se inviolabiliter servaturum aut quantum in ipso fuerit firmiter ac inviolabiliter impleturum In cujus rei testimonium nos premissis benigne nostrum impartientes assensum cum sigillis capituli et ipsius Iohannis sigillum nostrum presentibus duximus apponendum Actum anno gratie MCC vicesimo quarto mense Marcio