Charter Document - 02040019

Malignitatis spiritus oblivionis et ignorantie nubes que fideliter et autentice fiunt impugnare ac delere non nunquam solent Inde est quod ego Stephanus Eduensis ecclesie minister compositionis formam inter canonicos sancti Nazarii et Hugonem ducem Burgundie per manum meam factam ac non nullorum ducatus obtimatum scripto memorie tradidi quo veritas facti quibuslibet in posterum liquescat ac pravorum iniquitas qui obloqui laborant unde garrire possint perpetuo prorsus amittant Verum in terra que dicitur sancte Crucis ultra montes que a priscis temporibus beati Nazarii noscitur esse consuetudines quasdam quas prefatus dux in villa Bierie et villulis adjacentibus tam pro gravaminibus ecclesie unde eadem a divino officio cessabat necnon et terra ejusdem ducis quam pro anniversario patris sui similiter et suo cum acciderit donavit et dono concessit quicquid videlicet ibidem habebat in decem et octo mansis illius terre in sextariis vini in justiciis in consuetudinibus avenarum in corveis in annonagiis in indaginibus in ministerialium exactione vel consuetudine si quam ibi habebat Donavit quoque usuarium quod prius habebant homines illius terre eisdem in perpetuum possidendum videlicet in nemoribus suis irsartis planis aquis cursibus et recursibus earumdem in foro et in civitate Edue ut omnia ista homines illius terre in pace et quiete habeant et nichil inde neque duci neque alicui pro duce neque ministeriali neque alicui pro ministeriali aliquid tribuent vel persolvent Tuebitur autem predictus dux pro elemosina sua facta et pro anniversario patris sui et suo terram istam a raptoribus et maleficis ablata quoque hominum per se et suos bona fide queret quoad recuperare possint Ministerialis siquidem ducis Poncius videlicet potestatem et quicquid aliud in terra illa habebat vidente duce et jubente in manu Seguini decani guerpivit nichil ibidem deinceps habiturus Verumptamen prenominatus dux fecit hoc donum sicut diximus super altare sancti Nazarii et per missale ecclesiam inde investivit vidente me Stephano episcopo tam quoque canonicis et innumeris laicis Testes sunt isti Seguinus decanus B cantor G archidiaconus cardinalis G archidiaconus Avalonensis A archidiaconus Belnensis G prepositus Biliniaci Hugo abbas sancti Petri S abbas sancti Stephani Hugo Helias Garinus Ascherius Bernardus Huduinus Arardus canonici Robertus archipresbiter Hugo de Buxeio Achardus nepos ejus Hugo et alius Hugo de Monteneisum similiter canonici Ego vero Stephanus episcopus testis sum inde qui ad confirmacionem hujus facti sigillum meum apposui Ex parte ducis testes sunt Hugo de Monte sancti Iohannis Hiduinus de Hygornaco Hugo de Verreriis Guillelmus de Revello Guillelmus vigerius qui se immobiliter tenere supradicta juravit super altare sancti Nazarii Girardus de Revello Raginaudus de Revello Poncius forestarius Acta sunt autem hec Edue in camera episcopi primo die lune Quadragesime Alexandro papa in cathedra romana sedente Ludovico regnante feliciter amen