Charter Document - 02030050

Ego Leodegarius etsi indignus Heduorum episcopus septimo episcopatus mei anno considerans varias rerum mutationes sed et inevitabilem mortis terminum ac formidabilem judicii et cunctis tremendam districtionem judicis horam simulque pro his et hujuscemodi ad illam disciplinam recurrens que precipit date et dabitur vobis et facite vobis amicos de mammona iniquitatis qui vos recipiant in celis et illud recordans Sapientie monentis redemptio anime viri divitie ejus et sicut aqua extinguit ignem ita elemosina extinguit peccatum pro amore divinitatis pro remissione peccatorum pro pia quoque recordatione domni Clotharii et Badehildis regine pro statu necne regis Theoderici et regni ac cunctorum procerum ejus precipue pro his qui in dicendis rebus conquirendis adjutores donatores et conlaboratores nobis extiterint dono trado transfundo et heredem statuo ecclesiam beati Nazarii titulum mei presulatus de rebus meis hoc est de Mariniaco villa que jacet super Icaunam fluvium quam mihi jam dicta regina de proprio suo in proprium meum delegavit et per regale instrumentum carte habere concessit nec minus et de Tiliniaco villa que de jure materno ab avis et proavis mihi competit et est super fluvium Sagonnam necnon et de Olgia ac de Canavis villa quam de Bodilone et Sigrada Deo devota conquisivi cujus terra sita est tam infra castrum Divionem quam circa Quas villas cum catallis suis servis utriusque sexus terris vineis pratis aquis stangnis cursibus recursibus silvis pascuis majoris peculii vel minoris de statu nostro proprio in statum matricule nostre quam ad ostium ecclesie sancti Nazarii fabricavimus cum omnibus suis appenditiis delegamus secernimus transfundimus ea ratione ut a preposito ejusdem matricule Bercario quam a successoribus ejus quos nostri successores pontifices ordinaverint quadraginta fratres cotidiana diaria et stipendia omni tempore accipiant ut liberius pro salute regni et principum ac totius orbis Deum deprecari possint Si vero ullus majorum heredum vel minorum nostrorum aut alicujus persone homo hanc nostram et communem elemosinam et hujus instrumenti cartam violare presumpserit ut reus majestatis noverit se coram majore palacii vel capite vel centum libris auri multandum Episcopis autem successoribus nostris hec ita observari volumus sicut et plura in partem illorum contulimus et sicut hec coram Deo digna consideraverint Si vero deinceps alicujus obstinatio contra hec se erexerit noverit se etiam quinquaginta quattuor episcoporum qui a principibus nostris Crisciaco congregati sunt quibus presentibus vel quorum consilio hanc donationem ecclesie matriculeque nostre celebravimus et nostra quamvis extrema auctoritate excommunicatum et invocatione sancte Trinitatis potestate beati Petri apostolorum principis cum Juda traditore Domini qui loculos habens eque res Domini furabatur et pauperum eternaliter dampnandum et cum Dathan et Abiron quos vivos terra absorbuit inconsueta et desperabili morte in omnium viventium terrore nisi digna satisfactione resipuerit profligatum in perpetuum puniendum Amen Amen Acta Crisciaco publice tercio anno regni Theoderici regis Ego episcopus Leodegarius huic donationi facte sub anathemate subscribo et manu propria firmo