Charter Document - 02030048

Johannes episcopus servus servorum Dei reverentissimo et sanctissimo Heriveo sancte Augustudunensis ecclesie episcopo et per te in eadem ecclesia in perpetuum Oportet nos qui ecclesiastici culminis divina suffragante pietate munus suscepimus ut in distributione rerum ecclesiasticarum confratrum et coepiscoporum injuriis compatiendo armis ecclesiastice auctoritatis subveniamus et in restauratione fidelium devotione certam opem confirmationis ferendo gaudentibus congaudeamus Unde quia poposcit nostram paternitatem filiatio tua ut privilegio nostre auctoritatis res et villas tue ecclesie usibus deputatas videlicet que in honore beati Nazarii martyris sacrata est confirmare deberemus scilicet villam Tiliniacum cum suis appenditiis quam antecessor et avunculus tuus una per consensum et auctoritatem Richardi comitis et filiorum ejus eorum usibus delegaverat simul etiam et monetam tue civitatis quam per preceptum filii nostri Karoli gloriosissimi regis isdem antecessor tuus adeptus fuerat et ex tua largitione decimas reddituum omnium ecclesiarum tue dioceseos qui tertio anno exeunt tam ex his que tibi debentur quam etiam ex his que ministerialibus tuis contingunt necnon et capellas tres unam in honore sancti Johannis aliam in honore sancti Leodegarii tertiam in honore sancti Eptadii Decernimus autem per privilegii nostri auctoritatem et supra nominatam villam cum supradictis omnibus perpetuis temporibus in canonicorum usibus sine ambiguitate et sine cunctatione permaneant non solum autem illam sed etiam omnes eorum res videlicet Ruiliacum quod munificentia genitricis tue per consensum Richardi comitis illis contulit simul etiam Beliniacum Sussiacum autem Marcasolium necnon et Simpiniacum et Mariniacum cum omni integritate sua et omnibus appenditiis suis illorum usibus per apostolice auctoritatis privilegium confirmamus atque sub interdictionis excommunicatione ne quis illud violare audeat pontificali regimine seu modis omnibus prohibemus Si quis autem presumptor temerario ausu hoc quod tue humilitatis petitione et hoc quod pro elemosina regum et principum necnon et anime antecessoris tui nostra apostolica liberalitas privilegii auctoritate firmando roboravit et promulgando confirmavit contraire infringere contradicere subtrahere aut in aliquo imminuere innisus fuerit cognoscat se anathematis vinculo a Patre et Filio et Spiritu sancto eternaliter obligatum sed et cum Juda traditore Domini nostri Jesu Christi et fure sacrilego qui ea que pauperibus eroganda erant loculos habens furebatur ignis eterni incendio concremandum et in baratrum cum demonibus deputandum ac sine spe recuperationis demergendum Custodes autem et observatores hujus nostri decreti benedictio et pax Domini nostri Jesu Christi conservare dignetur per eterna secula