Charter Document - 02030030
| Charter Number: | 02030030 |
|---|---|
| Cartulary Title: | Cartulaire de l'Eglise d'Autun |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 0877 |
| Date type: | Internal, A.D. |
| Resource Link(s): |
|
Charter:
Anno Dominice incarnationis octingentesimo septuagesimo septimo indictione decima nos episcopi Ravenne in nomine Domini apostolica auctoritate et imperiali decreto in sancta synodo congregati presidente in eodem synodo sanctissimo et reverentissimo Johanne summo pontifice et universali papa Cum ecclesiastica negotia et sollicitudines pro viribus annuente divina gratia tractaremus affuit reverentissimus et confrater noster Adalgarius sancte Augustudunensis ecclesie episcopus missus etiam imperialis deferens nobis precepta imperialia et privilegia sedis apostolice roborata ex quodam monasterio Flavigniaco nomine quod est situm in pago Alsensi in parochia jam dicte Augustudunensis ecclesie quod munificentia et liberalitate christianissimi imperatoris et piissimi augusti Karoli jam dicte Augustudunensi matri ecclesie constat unitum et indissolubili nexu conjunctum perpetuoque jure sicut in precepto et privilegio que coram nobis lecta sunt eternaliter subjectum et ex Tiliniaco villa preceptum imperiale et apostolicum privilegium quam constat fuisse dudum a beato Leodegario martyre et pontifice eidem ecclesie collatam et tyrannia pravitate atque invasione pravorum hominum olim ab eadem ecclesia substractam et per idem preceptum memorati Augusti eidem sancto loco redditam et reformatam itemque privilegio apostolice sedis ex integro roboratam humiliter petens ut id quod factum fuerat etiam nostra auctoritate roboraretur Cujus petitioni caritatis et fraternitatis gratia libenter annuentes simul cum auctoritate et assensu jam dicti summi pontificis generali synodo presidentis statuentes decernimus et decernentes statuimus ut eadem precepta et privilegia inconvulsam obtineant omni tempore firmitatem Si quis autem presumptor temerario ausu hoc quod sepe dictus Augustus plenissima devotione pro anime sue suorumque salute eidem sancte Augustudunensi ecclesie contulit et restaurando reddidit et sedes apostolica privilegii auctoritate firmando roboravit necnon quod modo nostra humilitas et generalis totius synodi auctoritas promulgando totis viribus adstipulatur venire infringere contradicere subtrahere aut in aliquo imminuere temptaverit anathematis vinculo a Patre et Filio et Spiritu sancto cognoscat se eternaliter obligatum sed et cum Juda traditore Domini nostri Jesu Christi ignis eterni incendiis concremandum in baratrum perenniter deputatum ac sine spe recuperationis demergendum custodes vero et servatores hujus nostri decreti benedictio et pax Domini nostri Jesu Christi per eterna secula conservare dignetur Amen