Charter Document - 02030026

Auxiliante in perpetuum Domino Deo et Salvatore nostro Jesu Christo Heriveus ejusdem miseratione humilis Eduorum episcopus omnibus Dei et sancte Ecclesie fidelibus precipue autem venerandis episcopis instantibus videlicet ac succedentibus cognitum fore optamus quoniam cum nostram exiguitatem divina pietas ad regendam sue ecclesie cathedram vocari et sublimari permisisset in ipso primo nostre ordinationis anno ad exhortationem dilecte genitricis nostre domne Hirmingardis venerabilis comitisse et fratrum nostrorum diligenter studuimus inquirere et sollicite perscrutari qualiter caput ipsius ecclesie in constitutis canonicorum ibidem Deo et sancto Nazario militantium stipendiis dispositum maneret vel quibus predecessorum nostrorum subsidiis congregatio ipsa ordinata consisteret Sed ut experti sumus obsistentibus semper seculi perturbationibus et adversariis divini cultus impedientibus labor precedentium pontificum in his certare cupientium in contrariam semper est impulsus dilationem in tantum quod permanentibus perpaucis villarum solatiis domnus Adalgarius sancte recordationis episcopus villam Beliniacum et successor illius domnus Walo pius presul et noster avunculus villam Tilionacum usibus predicte congregationis mancipaverunt et suis scriptis confirmaverunt Nos igitur aliarum ecclesiarum congregationes honorabiliter in canonicis sumptibus subsistere cernentes et sacris suorum pontificum incrementis decenter augmentari perspicientes a sanctis episcopis nostris scilicet ordinatoribus moniti et predictorum affinium hortamentis roborati que libere ad presens fieri posse reperimus supradicte congregationis usibus dedicavimus villam Ruilliacum siquidem a memorata genitrice nostra dudum pro quadam commutatione possessam et nostro interventu in hujuscemodi obsequiis redditam cum ecclesia et omnibus ad se juste pertinentibus Ecclesiam etiam sancti Johannis sitam in comitatu Belnensi nostra liberalitate concessimus In comitatu quoque Augustodunensi ecclesiam sancti Eptadii sitam in villa que vocatur Monstholonus olim inde substractam reddimus Ecclesiam similiter sancti Leodegarii a jam dicto avunculo nostro conlatam huic confirmationi confirmavimus Monetam quoque quam isdem pater a prelibata sua ecclesia olim substractam fuisse didicerat et interventu domni Richardi piissimi ducis per regium preceptum receperat et hujusmodi officiis una cum dispositis quarumdam festivitatum luminariis optari decreverat in eadem nos sua dispositione servituram delegavimus Duos insuper mansos terre sitos in Sussiaco illorum villa quorum unum Osmarius jure beneficiario possederat et sua prece ut ab eodem antecessore nostro illis concederet obtinuerat alterum vero quidam nostre domus famulus pro fabrili obsequio dum adviveret simili jure possederat et hunc nostra cessione contulimus et concessum antea jure prefixco roboramus Nec reticendum judicavimus qualiter sepe dictus pater et avunculus noster decimam partem ex publico reditu qui nobis et nostris ministris in ejus successione ab omnibus totius dioecesos nostre ecclesiis reddebantur in congruis ecclesie obsequiis ubi amplius necessarium fore estimabat destinare solebat expendendam Nos ergo et illud bono desiderio fuisse dispositum non dubitantes et quod ecclesiasticam immo et regularem religionem indigentie causa multoties neglectam audivimus oblivisci non valentes memores etiam exemplorum ecclesiastice doctrine quibus jubetur ut pro deauratione parietum et ornamentis laqueariorum ipse que omnia continere debent columne negligantur aliisque preceptorum divinorum fulti monitis opere pretium duximus ut in vestimentorum prefate congregationis solatiis prelibate paratarum decime implerentur et a suprascripta nostra auctoritate confirmentur Unde et hoc nostre institutionis testamentum fieri decrevimus per quod et supradictorum patrum ordinatorum nostrorum auctoritatem his assensum prebere oramus et nostre humilitatis decreto confirmamus ut quidquid a predecessoribus nostris ita est dispositum atque concessum et a nobis pia devotione institutum et delegatum jure firmissimo maneat inconvulsum ac sicut supra habetur consignatum omnibus hujus vite temporibus persistat inconcussum Successorum sane nostrorum in successionem nostram humiliter obsecramus ut hanc nostre devotionis institutionem ita observent quemadmodum a suis successoribus sua observari optabunt statuta quo pro tali observatione participes ejusdem mercedis effici mereantur quam credimus Deo miserante pro talibus nos recepturos institutis Ut igitur hoc nostre confirmationis testamentum tutiorem in Dei nomine obtineat firmitatis plenitudinem manu illud firmavimus et prelibatorum patrum manibus insigniri poposcimus amicorum quoque et omnium nostre ecclesie fidelium assignationibus subtus jussimus roborari Actum apud Cavillonum civitatem ob presentiam episcoporum feliciter in Domino Amen