Charter Document - 02030024

In nomine sancte et individue Trinitatis Odo clementia Dei rex Si locis sacris et divinis cultibus mancipatis aut propria largiendo aut olim subtracta restituendo opem subsidium accomodamus hoc procul dubio ad emolumentum regie tranquillitatis nobis profuturum non diffidimus Quamobrem noverit omnium sancte Dei Ecclesie fidelium nostrorumque unanimis generalitas quoniam adiens celsitudinem nostram Adalgarius reverendus Eduorum episcopus humiliter nostre retulit serenitati qualiter villam Tiliniacum quam nos jure proprietatis possidere videbamur sanctus Leodegarius predicte ecclesie quondam pontifex ex suo proprio sancto Nazario ac prefate sue ecclesie eternaliter contulerat possidendam et postquam a precedentibus nostre prolis parentibus simulque heredibus injuste ac contra omnem legitimam rationem fuisset male usurpata ac temeraria presumptione ab eadem ecclesia alienata a predecessoribus nostris regibus post inquisitionem suorum procerum preceptorum suorum auctoritatibus eidem fuerat sollempniter restituta insuper etiam apostolico privilegio roborata et multorum episcoporum generali excommunicatione ne iterum violaretur innodata Que siquidem villa est sita in pago Oscarensi supra fluvium Sagonnam Nos igitur tam predicti viri Dei qui hanc eamdem villam jam dicte ecclesie sue donasse dicebatur quam etiam memorati Christi athelete beati scilicet Nazarii ob cujus nominis reverentiam prefixe matri Ecclesie data fuisse affirmabatur offensionem quoque judicis incurrere pertimescentes et quod periculosius creditur sub oculis Omnipotentis in hujuscemodi obstinatione manere qualicumque ignorantia formidantes maluimus nostra propria regio more ecclesiasticis obsequiis mancipare quam ea que dubio pendebant judicio aliqua occasione denegare Unde ad fidelissimam memorati Adalgarii venerabilis episcopi exhortationem et dilecti fratris nostri Robberti illustrissimi marchionis consilium atque consensum pro nostrarum animarum atque parentum nostrorum remedio et si quid in hac re offensionis videtur gratissima absolutione prenominatam villam Tiliniacum cum omnibus ubicumque positis ad illam aspicientibus libuit serenitati nostre sepe nominato pontifici sueque ecclesie et restituendo reddi et condonando largiri eo quidem jure ut si justa et legali donatione sicut premissum est ab episcopis prefate ecclesie extitit possessa inviolabiliter eidem maneat restaurata Sin vero ut quidam nostre partis ministri referunt nostre proprietatis justius fuisse visa est fiat nostra regali munificentia et nominati fratris nostri largitione a nostro communi jure in jus et dominationem ecclesie beati Nazarii et suorum pontificum in perpetuum mancipata Propterea et hoc nostre restitutionis preceptum immo et largitionis fieri jussimus per quod statuentes decernimus ut supra signatam villam Tiliniacum cum omni sua integritate videlicet cum mancipiis vineis pratis silvis pascuis ceterisque terris ecclesiis quoque cum suis appenditiis aquis etiam aquarumque decursibus exitibus et regressibus et cum omnibus ad se juste et legaliter pertinentibus quesitis et inquirendis tam presens quam et futuri supradicte ecclesie episcopi sicut reliquas ejusdem ecclesie beati martyris Nazarii res sine aliqua contradictione aut injuste substractione seu cujusquam mala usurpatione inviolabiliter teneant et canonico in regendo potiantur arbitrio nullo inquietante aut dirumpetne Ut ergo hec nostre liberalitatis restitutio seu cessionis largitio pleniorem in Dei nomine obtineat firmitatis vigorem manu propria firmantes annuli nostri impressione subter jussimus insigniri