Charter Document - 02030023

Anno sacratissime incarnationis Domini nostri Jhesu Christi DCCCCXVIII indictione VII Walo superna dispensante miseratione humilis Eduorum episcopus omnibus pie in Christo vivere cupientibus et ad spem celestis patrie tendentibus notum fieri volumus quoniam cernentes congregationem prefate sancte matris Ecclesie stipendiis alimentorum necessariis nimia difficultate carere pro quo nec pastoralis exhortationis vigilantia nec collaboratorum nostrorum regularis correctio variantibus undique seculi perturbationibus ad divinorum obsequiorum studia provocare quorumdam fratrum ipsius loci intentionem valebat et sollicite perpendentes quia pastoris cure est gregum sibi commissorum inopiam providere et sine quibus subsistere nequeunt necessaria alimenta ministrare Dignum fore duximus ne in hujus torporis otio divine militie cultus suffocaretur de rebus ipsius ecclesie aliquod prebere subsidium Proinde amore divino tacti et consilio fidelium ejusdem sancte ecclesie et nostrorum roborati adhibito etiam hortamento et auxilio domni Richardi excellentissimi ducis cujus defensione et protecmento per Dei administrationem hec ipsa consistit ecclesia villam Tilionacum sitam in comitatu Oscarensi supra fluvium Sagonnam ad stipendia supradicte congregationis ministranda mancipavimus cum omni sua integritate sicut a beato Leodigario ejusdem nostre ecclesie quondam pontifice ex proprio eidem fuit collata et postmodum per precepta regum restituta et confirmata et insuper apostolico privilegio roborata quatinus sublata omnis indigentie occasione liberius et vigilantius grex ipsius collegii Deo et sancto Nazario militare valeat et attentius pro remedio animarum domni Karoli serenissimi augusti et conjugis illius Hirmintrudis ac totius prolis illorum sed et pro absolutione domni Odonis gloriosi regis et nobilissimi fratris illius domni Rothberti illustris marchionis cum precedente progenie et subsequente posteritate illorum et omnium largitorum et restauratorum earumdem rerum ipsi ecclesie Domini misericordiam implorare studeat pro diuturna quoque tranquillitate et quiete domni Richardi piissimi ducis et nobilissime conjugis illius ac clarissimorum filiorum illorum et omnium fidelium suorum quatinus defuncti eternam mereantur omnium peccatorum indulgentiam et remissionem et viventes optabilem prosperitatem et sanitatem et ad defensionem sancte Ecclesie et gentium sibi commissarum sub munimine divine dextere laudabilem et acceptabilem Deo virtutem atque pro inpenso labore digne mercedis remunerationem Omnem igitur hujus rei summam memorati principis domni Richardi defensioni et protectioni et per eum filiorum ejus cooperationi in Dei nomine tuendam committimus pro cujus amore qui omnium benefactorum certissimus remunerator est tantam impendere non graventur elemosynam quantam ab eo non possunt diffidere se precepturos cum plenitudine omnium celestium premiorum gratiam Quia ergo divina pietas nos ad hoc perscrutandum atque exhibendum provocavit nostramque humilitatem ad suam voluntatem implendam et predicandam excitavit humiliter imploramus ut supradictarum precum oblatione adjuti eorumdem premiorum participes fieri mereamur Pro misericordia autem que se in tribulatione querentibus nulli denegat pro fratris nostri Manasse absolutione simili prece obsecramus ut qui illicita et periculosa temeritate hanc ipsam villam male usurpavit et ad gremium sancte matris Ecclesie penitendo confugiens per prenominatum principem suo interventu restitui fecit ut beneficiis supradictarum orationum consolari mereatur Successorum itaque nostrorum reverendam deprecamur paternitatem ut hujus nostre institutionis testamentum ita inviolabiliter observent et suis diebus observari faciant quem admodum id quod pie agere decreverunt a suis successoribus ita observari optabunt quo participes ejusdem mercedis fieri mereantur qua nos credimus Deo propitio pro talibus remunerari pie devotionis institutis Si qui forte contrarii vel invasores extiterint hujus nostri decreti et eum in aliquo violare aut subtrahendo diminuere presumpserint eos auctoritate tremende Trinitatis et beati Petri potestate et sanctorum canonum discussione et nostro vel omnium episcoporum ministerio excommunicamus anathematizamus et a conventu fidelium seu a liminibus sancte Ecclesie secernimus et sequestramus usque ad condignam emendationem et satisfactionem Et nisi cito ab hac presumptione resipuerint in sortem Jude traditoris Christi inprecando sociamus atque cum Dathan et Abiran quos vivos terra absorpuit et infernus excepit dampnamus et in baratrum perditionis demergimus Observatores autem et defensores hujus pie constitutionis omnium benedictionum plenitudo prosequatur Et ut hoc nostre cessionis testamentum et super adnotata dampnationis plaga in Dei nomine obtineat firmitatis rigorem non solum mei sed et ceterorum episcoporum manibus firmari decrevimus et tam memorati principis ac filiorum ejus quamque fidelium illorum nominibus roborari postulavimus Actum Augustiduno feliciter in Domino Amen