Charter Document - 02030016

In nomine Dei eterni et Salvatoris nostri Jesu Christi Karlomannus gratia Dei rex Si ecclesiis Dei eorumque rectoribus opem ferendo consulimus regio more consuescentes Deus nobis ob id presenti et futuro seculo propitiari non dubitamus Quamobrem omnium sancte Dei Ecclesie fidelium atque nostrorum noverit unanimis generalitas quoniam Adalgarius venerabilis Augustidunensium episcopus innotuit serenitati nostre quasdam res preceptis genitoris nostri Hludovici gloriosi regis avique nostri dive recordationis Karoli imperatoris augusti ecclesie sibi largitate commissas sed et privilegio apostolice sedis plurimorumque episcoporum easdem res irrefragabiliter confirmatas id est abbatiam Flavigniacum cum integritate sui villam Beliniacum villam Lucennacum villam Lantiliacum Unde ob majoris firmitatis vigorem deprecatus est ut easdem res nostro quoque jam dicte sibi commisse ecclesie confirmaremus precepto libentius cessimus quo nobis profuturum conspeximus amplius Confirmamus autem supradictas res cum omni integritate et Mariniacum ex eadem ecclesia pertinentem retro abstractam reddimus supradicteque ecclesie in perpetuum ad habendum firmamus ita ut merces nostra cum predecessorum nostrorum augeatur mercede Preterea jamdictus presul decreverat auctoritate nostra confirmaremus ut quisquis clericorum sancti Nazarii episcopatus mansiones suas infra claustra edificare voluerit securus adimplere possit absque cujuslibet hospitalitatis oppressione quatinus liberius pro nostra et totius generalitatis utilitate divinam pulsare valerent pietatem atque easdem mansiones cum ipsa terra post obitum suum cuicumque ex clero ipsius ecclesie voluerint vendendi et donandi liberam habeant potestatem Nos autem et hec confirmamus et sicut in privilegio suo ipse statutum habet concedimus delegamus ut a nullo unquam successorum suorum immutari possit regia auctoritate prohibemus sed quod ab eo actum est et a nobis firmatum jure firmissimo maneat inconcussum Ut autem hujus nostre auctoritatis confirmatio pleniorem in Dei nomine obtineat firmitatis vigorem ac diuturnis valeat durare temporibus manu nostra illam subter firmavimus et annuli nostri impressione subsignari jussimus Signum Karlomanni gloriosissimi regis Norbertus notarius subscripsit Datum pridie nonas martii anno V regni Karlomanni gloriosi regis indictione prima Actum apud Trupesiacum villam in Dei nomine feliciter Amen Theodoricus et Anscharius comites ambasciaverunt