Charter Document - 02030012

Quoniam primi parentis culpa exigente vita hominis et memoria in eternum duratura nisi homo peccaret facta mortalis cito labitur et evanescit donationes concessiones et conventiones quas inter se haberent homines ne oblivione deperirent scriptis annotari humana ratio procuravit Nos hujus modi salubre consilium priorum patrum approbantes malarum consuetudinum quas Hugo dux Burgundie Odonis ducis filius injuste habere consueverat in villa Canavis et Gratematio et earum appendiciis liberam dimissionem et omnimodam libertatem scribere et tam futuris quam presentibus hujus carte testimonio notificare opere precium duximus ut quod inspirante divina gratia a cultoribus justicie et fidelibus bene agitur transgredi et violare malignantium temeritas et audacia omnino vereatur Stephanus Dei gratia Eduensis episcopus post electionem suam Hugonem ducem et Wilemum comitem Nivernensem de constituenda et tenenda pace curiosus convenit et ut pax per totum episcopatum suum statueretur et teneretur cum illis firmande pacis diem constituit Statuta die episcopus dux et comes et alii plurimi amatores justicie Eduam convenerunt pacem quam dux monachus antea statuerat sacramentis firmaverunt et si quandoque frangeretur ut in festo sancti Nazarii ad restituendam pacem annis singulis Eduam convenirent statuerunt Sequenti festo sancti Nazarii episcopus et conventus clericorum Eduensis ecclesie de malis et injustis consuetudinibus quas in villa Canavis et Gratematio cum tirannide exercebat et de Tebbaldo Cambosio et filiis suis quos ut suos proprios esse dicebat graviter conquerendo duci clamorem de malis que eis inferebat fecerunt Dux igitur de eorum querimoniis ut sicut jus exigeret episcopo et canonicis satisfaceret apud Divionem castrum diem constituit scilicet diem Revelationis sancti Stephani protomartiris Die statuto et loco episcopus et canonici dux et sui pro sedandis supradictis querimoniis in domum Dominici mercatoris convenerunt ibique in presentia ducis et curie sue episcopus et canonici de predictis villis querimoniam et clamorem iterum presentaverunt nichilque penitus in eis ducem habere veris rationibus et scriptis autenticis approbaverunt Insuper si quid in prefatis villis et earum appendiciis et in Tebbaldo et filiis suis dux Burgundie juste vel injuste habuerat quod pater suus videlicet Odo beato Nazario et Eduensi ecclesie et canonicis ultima die concilii apud Eduam ab Hugone Lugdunense archiepiscopo et sedis apostolice legato celebrati omnino dimiserat memoriter retulerunt et cartam de demissione malarum consuetudinum et omnimoda libertate Canavis et Gratematii quam super altare sancti Nazarii pater suus posuerat ut firmius teneretur ostenderunt unumque ex filiis Ecclesie ibidem in habenda memoria a duce osculatum fuisse retulerunt testante carta Verumtamen nundum veridicis rationibus et scriptis adquiescens immo diutinam possessionem suam dux pretendens ut de suis et canonicorum verbis curia sua ad faciendum judicium in partem iret tandem concessit Ad faciendum igitur judicium in partem secesserunt Ansericus canonicus et prepositus sancti Nazarii Walo abbas et frater ejus Werricus Adimarus de Maso Wilelmus de Fulventio Hugo dapifer ducis Teccelinus Sorus Tebbodus Dainac Factum est judicium Tebbodus Dainac illud retulit in his verbis Ecclesiam Eduensem debere possidere jure et dimissione Odonis ducis predictas villas cum suis appendiciis et eas inhabitantes et inhabitaturos cum omni libertate et tranquilla pace judicamus Relato igitur judicio Hugo dux qui ibi presens aderat cartam per quam nominatas villas ab omni mala consuetudine et captione liberas et absolutas pater suus reddiderat accepit et quidquid juste vel injuste in Gratematio et Canavis et appendiciis ceperat et habuerat totum Deo et beato Nazario et canonicis deseruit ponensque cartam in manu episcopi in hec verba prorupit Ego dux Burgundie Hugo omnes malas consuetudines et captiones et quicquid juste vel injuste in Gratematio et in Canavis et earum appendiciis et inibi habitantibus et in habitaturis hactenus habui et habere consuevi Deo et beato Nazario et tibi Stephano episcopo et Eduensi ecclesie totum dono trado concedo et omnino dimitto Si quis hoc violare presumpserit feriatur anathemate sancti Leodegarii episcopi et martiris