Charter Document - 02030002

Paschalis servus servorum Dei dilecto fratri Norigaudo episcopo ejusque successoribus canonice substituendis in perpetuum quoniam divini dispensatione judicis ad hujus officii gradum licet indigni promoti sumus et Apostolorum principis vices in Ecclesie regimine teneamus elaborandum nobis est et annitendum omnino ut in constituendis ecclesiasticis negotiis ejus monita et institutiones devotione fidelissima et fide devotissima emulemur cujus fides precipua et dilectio spectata Deo extitit adeo ut in ejus singulariter fidei stabilitate immobili precioso sanguine suo redemptam suam Dei Filius statuere et confirmare voluerit Ecclesiam dicens Tu es Petrus et super hanc petram edificabo ecclesiam meam Cui etiam tantam potestatis prerogativam concessit ut ejus arbitrio in celo et in terra vel ligando ligarentur vel solvenda solverentur Quam potestatis sue successionem ipse beato Clementi et per eum omnibus concessit qui ejus sedi juste providere et ecclesiam Dei canonica studuerint ordinatione disponere Cujus nos fidei auctoritate muniti tibi dilecte frater Norigaude omnibusque tibi canonice successuris confirmamus omnia que ad Eduensem ecclesiam in qua te canonice credimus ordinatum pertinere videntur tam in ecclesiis parrochiis cimiteriis presbyteris cunctisque ecclesiasticis ordinibus quam etiam prediis aliisque omnibus possessionibus mobilibus et immobilibus que acquisita sunt vel juste acquiri poterunt ut hec omnia tibi tuisque successoribus ita libere possidere liceat sicut antecessor tuus in uno die ante obitum quiete et juste possedisse probatur Illud autem apostolica auctoritate statuimus ut nulli presbytero vel viventi vel morienti seu ad aliam religionem vel ad quietam vitam transeunti liceat res quas a die ordinationis sue in ecclesia in qua est ordinatus conquirere poterit auferre vel minuere sed intacta ea et illibata in ipsa in qua conquisita sunt permittat ecclesia remanere Illos etiam qui a vobis excommunicati vel ob officiis divinis pro suis fuerint excessibus remoti ne aliquis in communionem recipere vel in officiis presumat restituere eadem auctoritate prohibemus Statuimus quoque ut pro sepulture quidem loco vel spatio nullum penitus ab aliquo pretium exigatur Pro redemptione vero peccatorum morientes in ecclesia in qua fidei sacramenta acceperunt elemosynam dare secundum apostolica decreta statuimus omnino et confirmamus Si quis ad alia vivens sive moriens se conferre voluerit de eo quod pro salute anime sue dare disposuerit secundum apostolica decreta matrici ecclesie partem relinquat Si qua sane ecclesiastica secularisve persona contra hanc nostre constitutionis paginam presumptuose venire temptaverit hujusmodi ut sacrilegii reum a liminibus sancte Dei Ecclesie arcendum judicamus et confirmamus Cunctis autem ejusdem ecclesie justa servantibus sit pax Domini nostri Jesu Christi quatenus et hic fructum bone actionis percipiant et apud bonorum retributorem premia eterna pacis inveniant Amen Amen Scriptum per manum Johannis scriniarii sacri Lateranensis palatii Ego Paschalis episcopus catholice Ecclesie subscripsi Ego Walterius indignus Albanensis ecclesie subscripsi Ego Albertus cardinalis tituli sancte Savine subscripsi Ego Bernardus indignus cardinalis tituli sancti Grisogonis subscripsi Ego Albericus Dei gratia humilis presbyter tituli Apostolorum ad Vincula roborando subscripsi Ego Augustinus indignus cardinalis de titulo SS IIII Coronatorum subscripsi Datum Lateranis per manum Leonis scriptoris XVIII kal maii indictione VIII anno Dominice incarnationis MC pontificatus autem domini Paschalis secundi I